နိုင်ငံတော်သမ္မတ ဦးမင်းအောင်လှိုင်နှင့် ထိုင်းနိုင်ငံဝန်ကြီးချုပ်တို့ မြန်မာ–ထိုင်း စီးပွားရေးဖိုရမ် ၂၀၂၆ သို့ တက်ရောက်မိန့်ခွန်းပြောကြား

မြန်မာ–ထိုင်း–အိန္ဒိယ သုံးနိုင်ငံအဝေးပြေးလမ်းမကြီးက ဒေသတွင်းနှင့် နိုင်ငံတကာကုန်သွယ်ရေးတွင် မြန်မာနိုင်ငံ၏ အချက်အချာကျသည့် အခန်းကဏ္ဍကို မြှင့်တင်ပေးမည်

ဗန်ကောက်၊ ဩဂုတ် ၆

ထိုင်းနိုင်ငံသို့ တရားဝင်ခရီးစဉ် (Official Visit) အဖြစ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် ထိုင်းနိုင်ငံဝန်ကြီးချုပ် မစ္စတာ အနုထင် ချာဝီရကွန်တို့သည် ယနေ့ ဩဂုတ် ၆ ရက် မွန်းလွဲပိုင်းတွင် ကျင်းပသည့် မြန်မာ–ထိုင်း စီးပွားရေးဖိုရမ် ၂၀၂၆ သို့ အတူတကွတက်ရောက်၍ မိန့်ခွန်းများ ပြောကြားခဲ့ကြသည်။

အဆိုပါဖိုရမ်ကို ထိုင်းနိုင်ငံ ဗန်ကောက်မြို့ရှိ Queen Sirikit National Convention Center ၏ Plenary Hall တွင် ကျင်းပခဲ့ခြင်းဖြစ်သည်။

ဖိုရမ်၌ နိုင်ငံတော်သမ္မတ ဦးမင်းအောင်လှိုင်နှင့် ထိုင်းနိုင်ငံဝန်ကြီးချုပ် မစ္စတာ အနုထင် ချာဝီရကွန်တို့က မြန်မာ–ထိုင်း နှစ်နိုင်ငံအကြား စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ ပူးပေါင်းဆောင်ရွက်မှုများ တိုးမြှင့်ရေးနှင့်စပ်လျဉ်း၍ မိန့်ခွန်းများ ပြောကြားခဲ့ကြသည်။

ထို့ပြင် မြန်မာ–ထိုင်း–အိန္ဒိယ သုံးနိုင်ငံ အဝေးပြေးလမ်းမကြီးစီမံကိန်းသည် ဒေသတွင်းချိတ်ဆက်မှုကို ပိုမိုအားကောင်းစေပြီး အာဆီယံနှင့် တောင်အာရှဒေသတို့အကြား ကုန်သွယ်ရေးနှင့် ကုန်စည်ပို့ဆောင်ရေးတို့ကို ချိတ်ဆက်ပေးမည့် အရေးပါသော လမ်းကြောင်းတစ်ခုဖြစ်ကြောင်း၊ ယင်းစီမံကိန်းကြောင့် မြန်မာနိုင်ငံသည် ဒေသတွင်းနှင့် နိုင်ငံတကာကုန်သွယ်ရေးချိတ်ဆက်မှု၌ အချက်အချာကျသည့် နိုင်ငံတစ်နိုင်ငံအဖြစ် အဓိကအခန်းကဏ္ဍမှ ပါဝင်လျက်ရှိကြောင်း ထည့်သွင်းပြောကြားခဲ့သည်။

ထို့နောက် နိုင်ငံတော်သမ္မတနှင့် ထိုင်းနိုင်ငံဝန်ကြီးချုပ်တို့သည် ဖိုရမ်အတွင်း ခင်းကျင်းပြသထားသည့် ပြခန်းများကို လှည့်လည်ကြည့်ရှုလေ့လာခဲ့ကြောင်း သိရသည်။