ရန်ကုန်၊ ဩဂုတ် ၆
ပြည်တွင်း၌ထွက်ရှိသည့် မြန်မာ့ကျောက်မျက်ရတနာများကို ဈေးကွက်ခိုင်ခိုင်မာမာ ရရှိစေရန် ခေတ်မီဆန်းသစ်သည့် ဒီဇိုင်းများဖြင့် ထိုးဖောက်ရန် လိုအပ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူက ပြောကြားခဲ့သည်။
ပဥ္စမအကြိမ်မြောက် ရန်ကုန်အပြည်ပြည်ဆိုင်ရာ ကျောက်မျက်ရတနာနှင့် လက်ဝတ်ရတနာ အချောထည် အရောင်းပြပွဲ ၂၀၂၆ ဖွင့်ပွဲ အခမ်းအနားတွင် ထိုသို့ ထည့်သွင်းပြောကြားခဲ့ခြင်း ဖြစ်သည်။
တိုင်းဒေသကြီးဝန်ကြီးချုပ်က မိမိတို့ နိုင်ငံသည် သဘာဝ သယံဇာတ ရတနာမျိုးစုံ ကြွယ်ဝသည့် နိုင်ငံဖြစ်သဖြင့် ထွက်ရှိသည့် ရတနာများကို ပြည်တွင်း၌ ထိုက်ထိုက်တန်တန် ဈေးကွက်ရရှိအောင် ဆောင်ရွက်ရန် လိုကြောင်း၊ ကျောက်မျက်များကို အထည်ဒီဇိုင်း လှပရေး၊ ချောမောယဉ်ကျေးစွာ ကျောက်သွေးရေးနှင့် ခေတ်မီဆန်းသစ်သည့် အနုပညာမြောက် လက်ဝတ်ရတနာ ဒီဇိုင်းများ ဖန်တီး၍ စည်းရုံး ထိုးဖောက်ရမည် ဖြစ်ကြောင်း ပြောခဲ့သည်။
ထို့ပြင် ဈေးကွက်ထိုးဖောက်ရာ၌ ကျောက်မျက်၏ အရည်အသွေးအပြင် တီထွင်ဆန်းသစ်မှုများသည်လည်း အလွန်အရေးကြီးကြောင်း ထည့်သွင်းပြောကြားခဲ့သည်။
အဆိုပါ ပြပွဲတွင် ပြခန်းပေါင်း ၁၅၀ ပါဝင်ပြီး ၄ ရက်ကြာ ပြသသွားမည်ဖြစ်ရာ လာရောက်ကြည့်ရှုသူ ၈,၀၀၀ အထိ ရှိမည်ဟု ခန့်မှန်းထားသည်။
မြန်မာ့ကျောက်စိမ်းသည် တရုတ်ဈေးကွက်ကို အဓိကထားပြီး ပတ္တမြားနှင့် နီလာတို့မှာ ကမ္ဘာ့ဈေးကွက်ရှိကြောင်း သိရသည်။ ဒေသတွင်း၌ ထိုင်းနိုင်ငံသည် ကျောက်မျက်ဆိုင်ရာ ကုန်သွယ်မှု ဗဟိုချက် (Trade Hub) ဖြစ်နေသကဲ့သို့ မြန်မာနိုင်ငံအနေဖြင့်လည်း ယင်းကဲ့သို့ ဖြစ်လာအောင် ကြိုးစားအားထုတ်ရန် လိုအပ်ကြောင်း သိရသည်။