ဗန်ကောက်၊ ဩဂုတ် ၆
မြန်မာနိုင်ငံနှင့် ထိုင်းနိုင်ငံတို့သည် နှစ်နိုင်ငံဆက်ဆံရေးကို ပိုမိုခိုင်မာစေရန်အတွက် နိုင်ငံရေး၊ လုံခြုံရေး၊ စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ နယ်စပ်ဖွံ့ဖြိုးရေး၊ အာကာသနည်းပညာနှင့် ပြည်သူအချင်းချင်း ဖလှယ်ရေးကဏ္ဍများတွင် ပူးပေါင်းဆောင်ရွက်မှုများကို အရှိန်မြှင့် အကောင်အထည်ဖော်သွားရန် သဘောတူညီခဲ့ကြောင်း သိရသည်။
နှစ်နိုင်ငံခေါင်းဆောင်များ၏ ဆွေးနွေးမှုများအရ မြန်မာနှင့် ထိုင်းတို့သည် BIMSTEC၊ ACMECS စသည့် ဒေသတွင်းပူးပေါင်းဆောင်ရွက်ရေး ယန္တရားများမှတစ်ဆင့် ဒေသဖွံ့ဖြိုးရေးနှင့် စီးပွားရေးပူးပေါင်းဆောင်ရွက်မှုများကို ပိုမိုတိုးချဲ့ဆောင်ရွက်သွားရန် သဘောတူညီခဲ့သည်။
ထို့ပြင် မြန်မာနိုင်ငံ၏ Myanmar Space Agency (MSA) နှင့် ထိုင်းနိုင်ငံ၏ Geo-Informatics and Space Technology Development Agency (GISTDA) တို့အကြား Geo-Informatics နှင့် အာကာသနည်းပညာဆိုင်ရာ ပူးပေါင်းဆောင်ရွက်မှုများကို မြှင့်တင်သွားမည်ဖြစ်ပြီး သုတေသန၊ နည်းပညာဖလှယ်ရေးနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးတို့ကိုလည်း အလေးထား ဆောင်ရွက်သွားမည်ဖြစ်သည်။
လုံခြုံရေးကဏ္ဍတွင် နယ်စပ်တည်ငြိမ်ရေး၊ နိုင်ငံဖြတ်ကျော်မှုခင်းများ၊ အွန်လိုင်းလိမ်လည်မှု၊ မူးယစ်ဆေးဝါး၊ လူကုန်ကူးမှုနှင့် ငွေကြေးခဝါချမှုများကို ပူးပေါင်းတိုက်ဖျက်ရေးအတွက် Joint Commission (JC)၊ Regional Border Committee (RBC)၊ High-Level Committee (HLC) နှင့် Security Dialogue စသည့် ယန္တရားများမှတစ်ဆင့် အနီးကပ်ညှိနှိုင်းဆောင်ရွက်သွားမည်ဖြစ်ကြောင်း ဖော်ပြထားသည်။
စီးပွားရေးကဏ္ဍတွင် ကုန်သွယ်ရေးနှင့် ရင်းနှီးမြှုပ်နှံမှု တိုးမြှင့်ရေး၊ နယ်စပ်ကုန်သွယ်ရေး ဖွံ့ဖြိုးရေး၊ MSMEs များအား ပံ့ပိုးကူညီရေး၊ Multi-modal Connectivity ဖွံ့ဖြိုးရေးနှင့် ပုဂ္ဂလိကကဏ္ဍ ပူးပေါင်းဆောင်ရွက်မှုများကို အားပေးသွားမည်ဖြစ်ပြီး UMFCCI၊ Thailand-Myanmar Business Council (TMBC) နှင့် Thai Business Association of Myanmar (TBAM) တို့အကြား ပူးပေါင်းဆောင်ရွက်မှုများကိုလည်း တိုးမြှင့်သွားမည်ဖြစ်သည်။
ထို့အပြင် ပညာရေး၊ ယဉ်ကျေးမှု၊ ခရီးသွားလုပ်ငန်း၊ လူငယ်ဖလှယ်ရေးနှင့် ပြည်သူအချင်းချင်း ဆက်ဆံရေး (People-to-People Exchanges) များကို မြှင့်တင်ကာ နှစ်နိုင်ငံပြည်သူများအကြား နားလည်ယုံကြည်မှုနှင့် ချစ်ကြည်ရင်းနှီးမှု ပိုမိုခိုင်မာလာစေရန် ဆက်လက်ပူးပေါင်းဆောင်ရွက်သွားမည်ဖြစ်ကြောင်း သိရသည်။