ရန်ကုန်၊ ဩဂုတ် ၈
AFF Hyundai Cup 2026 အာဆီယံချန်ပီယံရှစ် အုပ်စု (ခ) နောက်ဆုံးပွဲစဉ်အဖြစ် အိမ်ရှင် ထိုင်းလက်ရွေးစင်အသင်းနှင့် မြန်မာ့လက်ရွေးစင်အသင်းတို့ ယနေ့ (ဩဂုတ် ၈ ရက်) မြန်မာစံတော်ချိန် ည ၇ နာရီတွင် ထိုင်းနိုင်ငံ၊ ရာချမန်ဂါလာ အမျိုးသားအားကစားကွင်း၌ ယှဉ်ပြိုင်ကစားကြမည် ဖြစ်သည်။
အဆိုပါပွဲစဉ်မတိုင်မီပြုလုပ်သည့် ပွဲကြိုသတင်းစာရှင်းလင်းပွဲတွင် မြန်မာအသင်း နည်းပြချုပ် Jørn Andersen က ‘ ကျွန်တော်တို့ ပွဲအတွက် အဆင်သင့်ဖြစ်နေပါပြီ၊ အသင်းအနေနဲ့ တစ်ပွဲပြီးတစ်ပွဲ ပိုပြီးကောင်းလာတာကို ပြီးခဲ့တဲ့ပွဲတွေမှာ တွေ့ရမှာပါ။ ကျွန်တော်ကိုယ်တိုင်လည်း ရှေ့တန်းကစားသမားဖြစ်ခဲ့တော့ တိုက်စစ်ဦးစားပေးတဲ့ကစားဟန်ကို ပိုမိုနှစ်သက်ပါတယ်””ဟု ပြောကြားခဲ့သည်။
၄င်းအနေဖြင့် တာဝန်ယူခဲ့သည့်အသင်းများတွင် တိုက်စစ်ဦးစားပေးသည့်နည်းဗျူဟာကို အသုံးပြုခဲ့ပြီး မြန်မာအသင်းနှင့်အတူ လေ့ကျင့်ရေးအချိန်တိုအတွင်း ကစားသမားများက နည်းပြအဖွဲ့၏ နည်းစနစ်ပိုင်း ညွှန်ကြားချက်များကို လိုက်နာနိုင်ခဲ့သည့်အတွက် ကျေနပ်မိကြောင်း ပြောကြားခဲ့သည်။
ထို့ပြင် ဟောင်ကောင်အသင်းကို တာဝန်ယူစဉ်ကတည်းက ထိုင်းနိုင်ငံ၌ လာရောက်ကစားဖူးသဖြင့် ထိုင်းအသင်း၏ အချက်အလက်များကို သုံးသပ်သိရှိထားပြီးဖြစ်ကြောင်းလည်း ၄င်းက ဆိုသည်။
မြန်မာအသင်း ကွင်းလယ်ကစားသမား ကျော်မင်းဦးကလည်း ထိုင်းအသင်းသည် အုပ်စုအတွင်း အင်အားကြီးအသင်းဖြစ်သော်လည်း မြန်မာအသင်းအနေဖြင့် ဖိအားမရှိဘဲ မိမိတို့အသင်း ပိုမိုကောင်းမွန်လာရေးကိုသာ အာရုံစိုက်သွားမည်ဟု ပြောသည်။ ထို့ပြင် ထိုင်းနိုင်ငံ၌ မြန်မာပရိသတ်များစွာ ရှိနေသဖြင့် အိမ်ကွင်းကဲ့သို့ ခံစားရပြီး ပရိသတ်များအတွက် အစွမ်းကုန် ကြိုးစားကစားသွားမည်ဖြစ်ကြောင်း ပြောကြားခဲ့သည်။