လေးမျက်နှာ ရေဘေးသင့်ပြည်သူ ၄၀,၀၀၀ ကျော်အတွက် ကျပ် ၁၄၆ သန်းကျော် ထောက်ပံ့

ဧရာဝတီ၊ ဩဂုတ် ၈

ဧရာဝတီတိုင်းဒေသကြီး၊ လေးမျက်နှာမြို့နယ်တွင် ရေဘေးသင့်ပြည်သူများအတွက် အခြေခံစားသောက်ကုန်နှင့် ဆန်ရိက္ခာများ ထောက်ပံ့ပေးလျက်ရှိရာ ဩဂုတ် ၇ ရက်အထိ လူဦးရေ ၄၀,၀၀၀ ကျော်အတွက် စုစုပေါင်း ကျပ် ၁၄၆ ဒသမ ၆၇၆ သန်းကျော် ထောက်ပံ့ပေးခဲ့ကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုး၏ ပြောကြားချက်အရ သိရသည်။

လက်ရှိတွင် လေးမျက်နှာမြို့ပေါ် ရပ်ကွက်များ၌ ရေပြန်လည်ကျဆင်းလာနေပြီး ရေဘေးကြောင့် ထိခိုက်ခဲ့သည့် ဆက်သွယ်ရေးကွန်ရက်များကိုလည်း အရှိန်မြှင့် ပြန်လည်ထူထောင်နေရာ ဆက်သွယ်ရေးဝန်ဆောင်မှု ၃၅ ရာခိုင်နှုန်းခန့် ပြန်လည်ရရှိနေပြီဖြစ်ကြောင်း သိရသည်။

လေးမျက်နှာမြို့နယ်တွင် မိုဘိုင်းစခန်း ၁၃ ခုရှိသည့်အနက် ရေဘေးကြောင့် ယာယီဖြုတ်သိမ်းထားရသည့် စခန်း ၆ ခုနှင့် Hub Site များ ထိခိုက်မှုကြောင့် ဆက်သွယ်မှုပြတ်တောက်နေသည့် စခန်း ၆ ခုရှိခဲ့သည်။

သို့သော် နင်းကြမ်း၊ ကျတ်ကွင်းနှင့် ယင်းဆယ်ကျေးရွာတိုရှိ မိုဘိုင်းစခန်း ၃ ခုကို ပြန်လည်ချိတ်ဆက်နိုင်ခဲ့ပြီး ခမောက်စုကျေးရွာရှိ မိုဘိုင်းစခန်းမှာလည်း ပုံမှန်ဆက်သွယ်ရေးဝန်ဆောင်မှုများ ပြန်လည်ပေးနေပြီဖြစ်သည်။

ထို့အပြင် စာရေးကွင်းကျေးရွာ ရေဘေးကွပ်ကဲရေးရုံးတွင် Cell on Wheel (COW) မိုဘိုင်းစခန်း တပ်ဆင်ထားပြီး စာရေးကွင်းကျေးရွာနှင့် ဆိတ်နိုကုန်းကျေးရွာရှိ ရေဘေးကယ်ဆယ်ရေးစခန်းများတွင် B2B Satellite Terminal တစ်စုံစီ တပ်ဆင်ကာ အရေးပေါ်ဆက်သွယ်ရေးဝန်ဆောင်မှုများ ဆောင်ရွက်ပေးနေကြောင်း သိရသည်။

လက်ရှိ ရေဘေးအခြေအနေအရ လေးမျက်နှာမြို့ရှိ အနိမ့်ပိုင်းနှင့် အမြင့်ပိုင်းရပ်ကွက်များတွင် ရေပြန်လည်ကျဆင်းနေပြီး ဩဂုတ် ၆ ရက် ည ၆ နာရီမှ ဩဂုတ် ၇ ရက် နံနက် ၆ နာရီအထိ ၁၂ နာရီအတွင်း အနိမ့်ပိုင်းရပ်ကွက် ၅ ခုနှင့် အမြင့်ပိုင်းရပ်ကွက် ၃ ခုတိုတွင် ရေမှတ် ၀ ဒသမ ၂ ပေစီ လျော့ကျခဲ့ကြောင်း သိရသည်။

မြို့နယ်အုပ်ချုပ်ရေးမှူးများနှင့် ရပ်ကွက်အုပ်ချုပ်ရေးမှူးများက ရေဝင်ရောက်မှုနှင့် ဘေးအန္တရာယ်အခြေအနေများကို အနီးကပ်စောင့်ကြည့်လျက်ရှိပြီး လက်ရှိတွင် ရေဘေးစိုးရိမ်ရမှုအခြေအနေမှာလည်း တဖြည်းဖြည်း လျော့နည်းလာနေပြီဖြစ်ကြောင်း သိရသည်။

ငဝန်တာ အရေးပေါ်ပြုပြင်ရေး ဆောင်ရွက်နေမှုများ(ဓာတ်ပုံ-ဧရာဝတီတိုင်းဒေသကြီးအစိုးရအဖွဲ့)