ထိုင်းနိုင်ငံတွင် ယာဉ်မတော်တဆမှုကြောင့် အသက်ဆုံးရှုံးခဲ့ရသည့် မြန်မာနိုင်ငံသားတစ်ဦးအတွက် ရသင့်ရထိုက်သည့် အာမခံကြေးငွေ ဘတ် ၂ သန်း (၂,၀၀၀,၀၀၀/- ဘတ်) ကို သမီးဖြစ်သူထံသို့ အလုပ်သမားသံအရာရှိရုံးမှတစ်ဆင့် လွှဲပြောင်းပေးအပ်ခဲ့ကြောင်း သိရသည်။
ဖြစ်စဉ်မှာ ပဲခူးတိုင်းဒေသကြီး၊ ဒိုက်ဦးမြို့နယ်မှ ထိုင်းနိုင်ငံသို့ လာရောက်အလုပ်လုပ်ကိုင်နေသူ အသက် ၄၂ နှစ်အရွယ် ဒေါ်ဥမ္မာလွင်သည် ပြီးခဲ့သည့် ၂၀၂၆ ခုနှစ်၊ ဧပြီလအတွင်းက နခွန်ပထုံမြို့နယ်၊ ညဈေးမီးပွိုင့်အနီး၌ ယာဉ်မတော်တဆမှု ဖြစ်ပွားခဲ့ပြီး အသက်ဆုံးရှုံးခဲ့ရခြင်းဖြစ်သည်။
အဆိုပါဖြစ်စဉ်အတွက် ပုဂ္ဂလိကအာမခံကုမ္ပဏီထံမှ ရသင့်ရထိုက်သော အာမခံကြေးငွေများ ပြန်လည်ထုတ်ယူနိုင်ရေး အလုပ်သမားသံအရာရှိရုံးက ကူညီဆောင်ရွက်ပေးခဲ့ခြင်းဖြစ်သည်။
အဆိုပါ အာမခံကြေးငွေ ဘတ် (၂) သန်းကို ယနေ့ သြဂုတ်လ (၃၁) ရက် နံနက်ပိုင်းက အလုပ်သမားသံအရာရှိရုံး၌ သေဆုံးသူ၏ သမီးဖြစ်သူ မနှင်းလဲ့လဲ့ဇော်ထံသို့ လွှဲပြောင်းပေးအပ်ခဲ့ပြီး ဖြစ်ကြောင်း သိရသည်။