ဂျပန်ဝန်ကြီးချုပ် Mrs. Takaichi ၏ ထိုင်ဝမ်အရေးနှင့်ပတ်သက်၍ပြောကြားခဲ့မှုအတွက် မြန်မာနိုင်ငံ၏သဘောထားကို နိုင်ငံတော်လုံခြုံရေးနှင့် အေးချမ်းသာယာရေးကော်မရှင် သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားခဲ့ခြင်းဖြစ်သည်။
မြန်မာနိုင်ငံအစိုးရသည် တရုတ်နိုင်ငံ၏ တရုတ်တစ်နိုင်ငံတည်းမူဝါဒ (One China Policy) ကို ခိုင်မာစွာထောက်ခံရပ်တည်လျက်ရှိပြီး တရုတ်တစ်နိုင်ငံတည်းမူဝါဒအပေါ် မြန်မာနိုင်ငံက ခိုင်မာစွာထောက်ခံရပ်တည်လျက်ရှိသည်ကို နိုင်ငံယာယီသမ္မတက တရုတ်နိုင်ငံခေါင်းဆောင်များနှင့်တွေ့ဆုံချိန်တိုင်းတွင် ထပ်လောင်းအတည်ပြုခိုင်မာစွာပြောကြားခဲ့ပြီးဖြစ်သည်ဟု ပြောသည်။
ထို့ပြင် တရုတ်-မြန်မာနှစ်နိုင်ငံသည် အိမ်နီးချင်း မိတ်ဆွေကောင်းနိုင်ငံများဖြစ်ပြီး မဟာဗျူဟာမိတ်ဖက်နိုင်ငံများနှင့် အေးအတူပူအမျှအသိုက်အဝန်းကို တည်ဆောက်နေသည့်နိုင်ငံများဖြစ်ခြင်းကို မြန်မာနိုင်ငံက အထူးအလေးထားတန်ဖိုးထားသည်ဟု ပြောသည်။
ထို့အတူ ငြိမ်းချမ်းစွာ အတူယှဉ်တွဲနေထိုင်ရေးမူကြီး ၅ ချက်၏ ပထမအချက်ပါအတိုင်း တရုတ်နိုင်ငံ၏ နယ် မြေတည်တံ့ခိုင်မြဲမှုနှင့် အချုပ်အခြာအာဏာပိုင်ဆိုင်မှုအား မြန်မာနိုင်ငံကလေးစားပြီး ၎င်းအချက်အပေါ်ကာကွယ်ခြင်းကိုလည်း မြန်မာနိုင်ငံက အစဉ်အမြဲထောက်ခံရပ်တည်လျက်ရှိသည်ဟု ဗိုလ်ချုပ်ဇော်မင်းထွန်းက ပြောကြားခဲ့သည်။