ထိုင်းတော်ဝင်မိသားစုဝင် မင်းသမီး ဘာဂျရာကီတီယာဘာ မဟီဒေါ၏ ကျန်းမာရေးအခြေအနေမှာ ပိုမိုဆိုးရွားလာကြောင်း ထိုင်းတော်ဝင်နန်းတော်က မေ ၂၁ ရက်တွင် ထုတ်ပြန်ကြေညာခဲ့သည်။
အသက် ၄၇ နှစ်အရွယ် မင်းသမီး ဘာဂျရာကီတီယာဘာ မဟီဒေါသည် ထိုင်းဘုရင် မဟာဝဇီရလောင်ကွန်း၏ အကြီးဆုံးသမီးတော်ဖြစ်ပြီး ၂၀၂၂ ခုနှစ် ဒီဇင်ဘာလအတွင်း စစ်ခွေးလေ့ကျင့်ရေးသင်တန်းတစ်ခု၌ ဖျားနာပြီးနောက် ဆေးရုံတက်ကုသမှု ခံယူနေခဲ့ရခြင်းဖြစ်သည်။
ယခင်က နန်းတော်ထုတ်ပြန်ချက်များအရ မင်းသမီးသည် သွေးလည်ပတ်မှုဆိုင်ရာ ပြင်းထန်သည့်ရောဂါခံစားခဲ့ရပြီး အဆုတ်နှင့် ကျောက်ကပ်လုပ်ဆောင်ချက်များကို ဆေးဘက်ဆိုင်ရာ ကိရိယာများနှင့် ဆေးဝါးများဖြင့် ထောက်ပံ့ပေးနေရကြောင်း သိရသည်။
မေ ၂၁ ရက် ထုတ်ပြန်ချက်တွင် မင်းသမီးမှာ အူမကြီးရောင်ရမ်းမှုကြောင့် ဝမ်းဗိုက်အတွင်း ပိုးဝင်ကူးစက်မှုဖြစ်ပွားခဲ့ပြီး သွေးပေါင်ကျခြင်း၊ နှလုံးခုန်မမှန်ခြင်းနှင့် ပုံမှန်မဟုတ်သော သွေးခဲခြင်းတို့ကိုလည်း ခံစားနေရကြောင်း ထိုင်းတော်ဝင်အိမ်တော်ထိန်းဗျူရိုက ဖော်ပြခဲ့သည်။
နန်းတော်၏ ထုတ်ပြန်ချက်အရ ရောဂါအခြေအနေကို ထိန်းချုပ်ရန် ခက်ခဲနေပြီး အခြားအင်္ဂါအစိတ်အပိုင်းများသို့လည်း သက်ရောက်မှုများ ရှိလာကြောင်း သိရသည်။
မင်းသမီး ဘာဂျရာကီတီယာဘာသည် ဗြိတိန်နိုင်ငံ၊ အမေရိကန်နိုင်ငံနှင့် ထိုင်းနိုင်ငံတို့တွင် ပညာသင်ကြားခဲ့သူဖြစ်ပြီး ကုလသမဂ္ဂတွင် တာဝန်ထမ်းဆောင်ခဲ့ကာ အကျဉ်းထောင်အတွင်းရှိ အမျိုးသမီးများ၏ အခွင့်အရေးနှင့် လူသားချင်းစာနာမှုဆိုင်ရာ လုပ်ငန်းများတွင် တက်ကြွစွာ ဆောင်ရွက်ခဲ့သူဖြစ်သည်။
ထိုင်းပြည်သူများအကြား “မင်းသမီး ဘာ” ဟု လူသိများသည့် မင်းသမီးသည် ဘုရင် မဟာဝဇီရလောင်ကွန်း၏ ပထမအိမ်ထောင်မှ တစ်ဦးတည်းသော သမီးတော်ဖြစ်ပြီး ဆေးရုံမတက်မီ တစ်နှစ်ခန့်က ဖခင်၏ ကိုယ်ရံတော်တပ်ဖွဲ့တွင် အကြီးတန်းရာထူးတစ်ခုသို့ ခန့်အပ်ခံခဲ့ရသည်။
အသက် ၇၃ နှစ်အရွယ် ဘုရင် မဟာဝဇီရလောင်ကွန်းတွင် အိမ်ထောင်လေးဆက်မှ သားသမီးခုနစ်ဦးရှိသော်လည်း လက်ရှိအချိန်အထိ နန်းမွေဆက်ခံမည့်သူကို တရားဝင် ကြေညာထားခြင်းမရှိသေးကြောင်း သိရသည်။
Ref: The Straits Times