လက်ရှိဖြစ်ပေါ်နေသည့် ကုန်စျေးနှုန်းကြီးမြင့်နေမှုများနှင့်ပတ်သက်၍ အစိုးရအနေဖြင့် လိုအပ်သည့် မူဝါဒများ ချမှတ်ကာ ထိန်းညှိဆောင်ရွက်သွားမည်ဖြစ်ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားခဲ့ခြင်းဖြစ်သည်။
မြန်မာနိုင်ငံ၏ ဆန်စပါးစိုက်ပျိုးသည့်နေရာ၌ သွင်းအားစုများရှိကာ လိုအပ်သည့် ဓာတ်မြေသြဇာ၊ပိုးသတ်ဆေးများကို တင်သွင်းနေရပြီး ဓာတ်မြေသြဇာနှင့် ပတ်သက်ပါက ဦးစားပေးတင်သွင်းလျက်ရှိသည်ဟု ပြောသည်။
လက်ရှိတွင် ပြည်တွင်းရှိ ဆန်/စပါး ဈေးနှုန်းများအပြင် ဆီဈေး၊ သား/ငါးဈေး၊ ကြက်သွန် (ဖြူ/နီ) ၊ ငြုပ် ၊ ဟင်းသီးဟင်းရွက်ဈေးနှုန်းများ အပါအဝင် အထွေထွေကုန်ဈေးနှုန်း ကြီးမြင့်မှုကို ရင်ဆိုင်နေရခြင်းဖြစ်ပြီး အစိုးရအနေဖြင့် အဆိုပါ ကုန်ဈေးနှုန်း ကြီးမြင့်မှုကို ထိန်းကြောင်းရန် ကြိုးစားနေခြင်း ဖြစ်သည်။
ယင်းကဲ့သို့ ကြိုးစားလျက်ရှိနေသော်လည်း နေ့စဉ်နှင့်အမျှ တရိပ်ရိပ်မြင့်တက်နေသည့် ကုန်ဈေးနှုန်းကြီးမြင့်မှုကို ထိရောက်စွာ ကိုင်တွယ်ဖြေရှင်းနိုင်မူအားနည်း နေဆဲဖြစ်ပြီးပြည်သူလူထုမှ အကြပ်အတည်းနှင့် ရင်ဆိုင်နေရဆဲ အခြေအနေဖြစ်သည်။
ပြည်တွင်း ဆန်ဈေးနှုန်း မြင့်တက်နေခြင်းမှာ ကမ္ဘာ့ဆန်ဈေးကွက်အတွင်း ဆန်စပါးအဓိကတင်ပို့သည့် နိုင်ငံကြီးများသည် ဆန်စပါးတင်ပို့မှု လျော့လိုက်ခြင်း၏ အကျိုးသက်ရောက်မှုကြောင့်လည်း ပါဝင်နေကြောင်းလည်း ၎င်းက ဆိုသည်။
“ဒါနဲ့ပတ်သက်ပြီး ကမ္ဘာမှာ ဆန်စပါးစျေးနှုန်းကြီးမြင့်လာနိုင်တယ်ဆိုတဲ့ မျှော်လင့်ချက်နဲ့ စျေးနှုန်းဆွဲတင်နေတာတွေရှိတယ်”ဟု ဗိုလ်ချုပ်ဇော်မင်းထွန်းက ပြောသည်။
နိုင်ငံတော်အစိုးရ အနေဖြင့် ပြည်တွင်းဖူလုံရေးကို ဦးစားပေးကာ ပြည်တွင်း၌ စားရေရိက္ခာ ပြည့်စုံဖူလုံမှသာ ပြည်ပတင်ပို့ခြင်းအား ဒုတိယ ဦးစားပေးအနေဖြင့် စဥ်းစားဆောင်ရွက်သွားမည်ဖြစ်ပြီး နိုင်ငံတော်အနေဖြင့် ကုန်စျေးနှုန်းနှင့်ပတ်သက်၍လည်း လိုအပ်သည့် မူဝါဒထိန်းညှိမှုများကို ဆောင်ရွက်သွားမည်ဟု ပြောကြားသွားသည်။