ဘားအံ၊ ဩဂုတ် ၈
ကရင်ပြည်နယ်အတွင်း တောင်သူများ ဝမ်းစာဖူလုံရေး၊ ဝင်ငွေတိုးတက်ရေးနှင့် ပြည်ပသို့ စပါး ပိုလျှံတင်ပို့နိုင်ရေးတို့အတွက် ၂၀၂၆-၂၀၂၇ ဘဏ္ဍာနှစ်တွင် မိုးစပါး ဧက ၄၂၈,၀၀၀ ကျော် စိုက်ပျိုးရန် လျာထားဆောင်ရွက်လျက်ရှိကြောင်း စိုက်ပျိုးရေးဦးစီးဌာနမှ သိရသည်။
လက်ရှိတွင် မိုးစပါး ဧက ၁၈၀,၀၀၀ ကျော် စိုက်ပျိုးပြီးစီးပြီဖြစ်ပြီး ကျန်ဧကများကို ဆက်လက်စိုက်ပျိုးသွားမည်ဖြစ်သည်။ စပါးအထွက်နှုန်း ကောင်းမွန်စေရန် စိုက်ပျိုးရေးဦးစီးဌာန ဝန်ထမ်းများက မြေပြုပြင်ခြင်းမှ ရိတ်သိမ်းချိန်အထိ ကွင်းဆင်း၍ နည်းပညာပေး ဆောင်ရွက်လျက်ရှိသည်။
ကရင်ပြည်နယ်၌ ပြီးခဲ့သည့်နှစ်က မိုးစပါး ဧက ၄ သိန်းကျော် စိုက်ပျိုးခဲ့ရာ တစ်ဧကလျှင် ပျှမ်းမျှ ၆၉.၇၈ တင်း ထွက်ရှိခဲ့ပြီး မျိုးကောင်းမျိုးသန့် ရရှိရေးအတွက်လည်း ဌာနမှ မျိုးစပါးများ ဖြန့်ဖြူးပေးလျက်ရှိသည်။
ထို့ပြင် ကရင်ပြည်နယ်တွင် မိုးအစေ့ထုတ်ပြောင်း၊ မိုးပဲတီစိမ်း၊ ပိန်းဥ၊ ကြံ၊ ကော်ဖီ၊ လက်ဖက်၊ မတ်ပဲ၊ နှမ်း၊ နေကြာနှင့် သံတောင်ကြီးဒေသတွင် ဖာလာ၊ ဇနွန်းတို့ကို စိုက်ပျိုးကြသည်။
စိုက်ပျိုးရေးဌာနအနေဖြင့် သီးနှံထွက်နှုန်း တိုးတက်စေရန် နည်းပညာများ လိုက်နာကျင့်သုံးရေးနှင့် Viber Group များမှတစ်ဆင့် နည်းပညာပေးခြင်းများကို အနီးကပ် ဆောင်ရွက်ပေးလျက်ရှိကြောင်း သိရသည်။