UNHCRက ကယားပြည်နယ် ဒေသခံပြည်သူ ၂၀၀၀၀ ကျော်အတွက် ကယ်ဆယ်ပစ္စည်းများထောက်ပံ့
ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR)က ကယားပြည်နယ်အတွင်းရှိဒေသခံပြည်သူ ၂၅၂၀၀ဦးတို့အားအဓိကအရေးပေါ်ကယ်ဆယ်ရေးပစ္စည်းများထောက်ပံပေးအပ်ပြီးဖြစ်ကြောင်း ယနေ့ဇွန်၁၀ရက်တွင် ထုတ်ပြန်သည်။
ယင်းထောက်ပံ့မှုသည် ပြီးခဲ့သော မေလ နှင့်ဇွန်လဆန်းပိုင်းတို့၌ ပေးအပ်ခဲ့ခြင်းဖြစ်ပြီး၊စောင်၊ ဆိုလာမီးအိမ်၊ ခြင်ထောင်၊ ရေပုံး၊ တစ်ကုယ်ရေသန့်ရှင်းရေးသုံးပစ္စည်းများ၊ တာပေါ်လင်စ၊ ဖျာ စသည်တို့ကို ထောက်ပံ့ပေးအပ်ခဲ့ခြင်းဖြစ်ကြောင်းဆိုသည်။
UNHCRအနေဖြင့် ကယားပြည်နယ်အတွင်းယခုကဲ့သို့ထောက်ပံပေးအပ်ခြင်းသည် ဒုတိယအကြိမ်ဖြစ်ပြီး၊ ကယားပြည်နယ် ရှိ ဒေသခံပြည်သူ ၅၄၂၀၀ဦးအတွက် ဧပြီလအစောပိုင်းတွင် ပထမအကြိမ်ထောက်ပံ့ပေးအပ်ခဲ့ကြောင်း ထုတ်ပြန်ချက်တွင်ဖော်ပြထားသည်။
UNHCR က မြန်မာနိုင်ငံတစ်ဝှမ်း အထူးသဖြင့်ကျေးလက်ဒေသနှင့်ဝေးလံခေါင်သီသောဒေသရှိ အကူအညီလိုအပ်နေသည့် ပြည်သူများထံသို့ လူသားချင်းစာနာမှုဆိုင်ရာအကူအညီများပေးအပ်ရန် အတွက် နည်းလမ်းများကို ဆက်လက်ရှာဖွေနေကြောင်း သိရသည်။
၂၀၂၁ခု နှစ် ဖေဖော်ဝါရီ ၁ရက်မှစတင်၍ ဖြစ်ပွားလျက်ရှိသော ဖြစ်ရပ်များကြောင့်မေလ ၃၀ရက်အထိ နေရပ်စွန့်ခွာရွှေ့ပြောင်းနေရသူ ပြည်သူ ၆၉၁.၀၀၀ဦးရှိသည့်ပြီး၊ လက်နက်ကိုင်တိုက်ပွဲများကြောင့် ယခင်ဆယ်စုနှစ်များစွာကတည်းက နေရပ်စွန့်ခွာရွှေ့ပြောင်းနေထိုင်လျက်ရှိသူဦးရေသည် ယခုနှစ်မေလအထိ စုစုပေါင်း၁.၀၃၈.၀၀၀ ဦးထိရှိလာပြီဖြစ်ကြောင်း စစ်တမ်းကောက်ယူချက်အရ သိရသည်ဟု ဖော်ပြထားသည်။
