မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော် သည် လာမည့် ဇွန်လဆန်းတွင် ကျင်းပမည့် “AYA Bank Tri Nations Women’s Football Invitation Cup 2026” ပြိုင်ပွဲအတွက် လေ့ကျင့်ပြင်ဆင်နေသည့် မြန်မာ့လက်ရွေးစင် အမျိုးသမီးဘောလုံးအသင်းထံ သွားရောက်၍ အားပေးစကားပြောကြားခဲ့ကြောင်း သိရသည်။
ဦးဇော်ဇော်သည် ယနေ့ညနေပိုင်းက သုဝဏ္ဏလူငယ်လေ့ကျင့်ရေးကွင်းတွင် လေ့ကျင့်မှုများပြုလုပ်နေသည့် ကစားသမားများနှင့် နည်းပြအဖွဲ့ဝင်များကို ရင်းရင်းနှီးနှီးတွေ့ဆုံနှုတ်ဆက်ခဲ့ပြီး ပြိုင်ပွဲအတွင်း မိမိတို့၏ အရည်အချင်းများကို အပြည့်အဝဖော်ထုတ်ပြသရန်၊ အသင်းအတွင်း စည်းလုံးညီညွတ်စွာဖြင့် တစ်ဦးနှင့်တစ်ဦး ကူညီရိုင်းပင်းကြရန်နှင့် စိတ်ဓာတ်ကြံ့ခိုင်စွာ ယှဉ်ပြိုင်ကစားကြရန် တိုက်တွန်းပြောကြားခဲ့ကြောင်း သိရသည်။
ထို့ပြင် လိုအပ်သည့် ပံ့ပိုးမှုများကိုလည်း အဖက်ဖက်မှ ဆက်လက်ကူညီပံ့ပိုးပေးသွားမည်ဖြစ်ကြောင်း ပြောကြားခဲ့သည်။
“AYA Bank Tri Nations Cup (Women’s Friendly)” ပြိုင်ပွဲတွင် မြန်မာ၊ ထိုင်းနှင့် ဥဇဘက်ကစ္စတန် အမျိုးသမီးအသင်းတို့ ပါဝင်ယှဉ်ပြိုင်မည်ဖြစ်ပြီး ဇွန် ၃ ရက် ညနေ ၄ နာရီတွင် မြန်မာအသင်းနှင့် ဥဇဘက်ကစ္စတန်အသင်း၊ ဇွန် ၆ ရက် ညနေ ၄ နာရီတွင် ထိုင်းအသင်းနှင့် ဥဇဘက်ကစ္စတန်အသင်း၊ ဇွန် ၉ ရက် ညနေ ၄ နာရီတွင် မြန်မာအသင်းနှင့် ထိုင်းအသင်းတို့ ယှဉ်ပြိုင်ကစားကြမည်ဖြစ်ကြောင်း သိရသည်။