အလုပ်သမားရှားပါးမှုဖြေရှင်းရန် ရွှေ့ပြောင်းလုပ်သားများ ပိုမိုခေါ်ယူရေး ထိုင်းစီးပွားရေးအဖွဲ့များ တိုက်တွန်း

ထိုင်းနိုင်ငံရှိ အလုပ်သမားအင်အား အများအပြားလိုအပ်သည့် လုပ်ငန်းကဏ္ဍများတွင် ကြုံတွေ့နေရသည့် အလုပ်သမားရှားပါးမှုပြဿနာကို အမြန်ဆုံးဖြေရှင်းပေးရန် ကူးသန်းရောင်းဝယ်ရေး၊ စက်မှုလက်မှုလုပ်ငန်းနှင့် ဘဏ်လုပ်ငန်းဆိုင်ရာ ပူးတွဲအမြဲတမ်းကော်မတီ (JSCCIB) က ထိုင်းအစိုးရကို တိုက်တွန်းခဲ့ကြောင်း သိရသည်။

အိမ်နီးချင်းနိုင်ငံများမှ ရွှေ့ပြောင်းလုပ်သားများ ဝင်ရောက်လုပ်ကိုင်နိုင်ရေးအတွက် ဥပဒေဆိုင်ရာ အတားအဆီးများကို ဖြေလျှော့ပေးရန်နှင့် အလုပ်လုပ်ခွင့်ပါမစ်များကို သက်တမ်းတိုးပေးရန် လိုအပ်ကြောင်း JSCCIB က ပြောကြားခဲ့သည်။

ယင်းကဲ့သို့ ဆောင်ရွက်ပေးခြင်းသည် ထိုင်းနိုင်ငံ၏ ယှဉ်ပြိုင်နိုင်စွမ်း၊ စီးပွားရေးတိုးတက်မှုနှင့် ပို့ကုန်ကဏ္ဍတည်ငြိမ်ရေးအတွက် အရေးကြီးကြောင်းလည်း ကော်မတီက ဆိုသည်။

မေ ၂၀ ရက်က ကျင်းပသည့် JSCCIB အစည်းအဝေးတွင် သဘာပတိအဖြစ် ဆောင်ရွက်ခဲ့သည့် ထိုင်းစက်မှုလက်မှုလုပ်ငန်းအဖွဲ့ချုပ် ဥက္ကဋ္ဌသစ် ပင်မ်ဂျေး လီရစ်ဆာရာနူကူလ်က ကုန်ထုတ်လုပ်ရေးနှင့် ပို့ကုန်ကဏ္ဍများတွင် အနှောင့်အယှက်မဖြစ်ပေါ်စေရန် အလုပ်ခန့်အပ်မှုလုပ်ငန်းစဉ်များကို ပိုမိုချောမွေ့စေရေးနှင့် အလုပ်လုပ်ခွင့်ပါမစ်များ တိုးချဲ့ပေးရေးအတွက် အာဏာပိုင်များကို တောင်းဆိုထားကြောင်း ပြောကြားခဲ့သည်။

ထို့ပြင် အရေးပါသည့် စက်မှုလုပ်ငန်းများ တည်ငြိမ်စေရန်၊ သင့်လျော်သော စည်းမျဉ်းစည်းကမ်းများ ထားရှိနိုင်ရန်နှင့် စီးပွားရေးဖွံ့ဖြိုးတိုးတက်မှုအပြင် လူမှုရေးစနစ်များကိုပါ အထောက်အကူပြုနိုင်ရန် ရွှေ့ပြောင်းလုပ်သားခေါ်ယူမှုဆိုင်ရာ မဟာဗျူဟာမြောက် မူဘောင်တစ်ရပ် လိုအပ်ကြောင်းလည်း ၎င်းက ဆိုသည်။

အလုပ်သမားပြဿနာကို ဖြေရှင်းနိုင်ရေးအတွက် ကာလတို၊ ကာလလတ်နှင့် ကာလရှည်အစီအမံများ ချမှတ်နိုင်ရန် JSCCIB သည် မကြာမီကာလအတွင်း အစိုးရတာဝန်ရှိသူများနှင့် တွေ့ဆုံဆွေးနွေးသွားမည်ဖြစ်ကြောင်း သိရသည်။

Ref: Bangkok Post