လင်ကျီး၊ ဇူလိုင် ၁၇
တရုတ်နိုင်ငံ၊ ရှီဇန်း (တိဘက်) ကိုယ်ပိုင်အုပ်ချုပ်ခွင့်ရဒေသ၊ လင်ကျီး (Linzhi) မြို့၌ ကျင်းပလျက်ရှိသော (၅) ကြိမ်မြောက် China Xizang Trans-Himalaya Forum for International Cooperation ၏ ဒုတိယနေ့ အစီအစဉ်အဖြစ် ရေရှည်တည်တံ့သော တောင်တန်းဒေသ ယဉ်ကျေးမှုနှင့် ခရီးသွားလုပ်ငန်း ဖွံ့ဖြိုးတိုးတက်ရေးဆိုင်ရာ အတွေ့အကြုံများနှင့် ပူးပေါင်းဆောင်ရွက်ရေး နည်းလမ်းများကို နိုင်ငံတကာပညာရှင်များက ဆွေးနွေးခဲ့ကြသည်။
ဖိုရမ်၏ ပထမအစီအစဉ်တွင် ရှီဇန်းကိုယ်ပိုင်အုပ်ချုပ်ခွင့်ရဒေသ ဒုတိယဥက္ကဋ္ဌ Xu Zhitao၊ ကမ္ဘောဒီးယားနိုင်ငံ ခရီးသွားလုပ်ငန်းဝန်ကြီးဌာန ဒုတိယဝန်ကြီး Nuon Someth၊ ကမ္ဘာ့စီးပွားရေးဖိုရမ် (World Economic Forum) မှ Greater China ဥက္ကဋ္ဌနှင့် အမှုဆောင်ညွှန်ကြားရေးမှူး Neo Gim Huay၊ South Asia Regional Friendship and Cooperation with China ဥက္ကဋ္ဌ Mohamed Rasheed နှင့် အီတလီနိုင်ငံမှ ရေရှည်တည်တံ့သော ခရီးသွားလုပ်ငန်းနှင့် ဇီဝမျိုးစုံမျိုးကွဲ ထိန်းသိမ်းရေးဆိုင်ရာ ကျွမ်းကျင်ပညာရှင် Corrado Teofili တို့က မိန့်ခွန်းများ ပြောကြားခဲ့ကြသည်။
ထို့နောက် “Cultural and Tourism Promotion” အစီအစဉ်တွင် ရှီဇန်းဒေသ၏ ယဉ်ကျေးမှုနှင့် ခရီးသွားလုပ်ငန်း အလားအလာများကို မိတ်ဆက်တင်ပြခဲ့ပြီး ဆက်လက်၍ မိနစ် ၉၀ ကြာ Panel Discussion ကို ကျင်းပခဲ့သည်။
ဆွေးနွေးပွဲတွင် “High-quality Development of Plateau Culture and Tourism” ခေါင်းစဉ်ဖြင့် ကုန်းမြင့်ဒေသ ယဉ်ကျေးမှုနှင့် ခရီးသွားလုပ်ငန်း အရည်အသွေးမြင့် ဖွံ့ဖြိုးတိုးတက်ရေးကို အဓိကထား ဆွေးနွေးခဲ့ကြပြီး တရုတ်နိုင်ငံနှင့် အီတလီနိုင်ငံတို့၏ တောင်တန်းဒေသ ဖွံ့ဖြိုးတိုးတက်ရေး အတွေ့အကြုံများကိုလည်း မျှဝေတင်ပြခဲ့ကြသည်။
အီတလီနိုင်ငံ၏ Alps တောင်တန်းဒေသ ဖွံ့ဖြိုးတိုးတက်ရေး အတွေ့အကြုံများ၊ ဒေသန္တရအုပ်ချုပ်မှုစနစ်၊ ရေရှည်တည်တံ့သော တောင်တန်းခရီးသွားလုပ်ငန်း လက်မှတ်စနစ် (ECST Certification)၊ ဇီဝမျိုးစုံမျိုးကွဲ ထိန်းသိမ်းရေးနှင့် ဒေသခံပြည်သူများ၏ ဝင်ငွေတိုးတက်စေမည့် နည်းလမ်းများကိုလည်း အီတလီနိုင်ငံမှ ရေရှည်တည်တံ့သော ခရီးသွားလုပ်ငန်းနှင့် ဇီဝမျိုးစုံမျိုးကွဲ ထိန်းသိမ်းရေးဆိုင်ရာ ကျွမ်းကျင်ပညာရှင် Corrado Teofili ကဆွေးနွေးခဲ့သည်။
ထို့ပြင် တောင်တန်းဒေသများတွင် ယဉ်ကျေးမှုအခြေပြု ခရီးသွားလုပ်ငန်း ဖွံ့ဖြိုးရေး၊ နှင်းကျားသစ်ကဲ့သို့ ရှားပါးတောရိုင်းတိရစ္ဆာန်များ ထိန်းသိမ်းရေး၊ အစိမ်းရောင်ဖွံ့ဖြိုးတိုးတက်ရေးနှင့် ဒေသခံပြည်သူများ၏ လူမှုစီးပွားဘဝ မြှင့်တင်ရေးတို့ကို ပူးပေါင်းအကောင်အထည်ဖော်နိုင်မည့် နည်းလမ်းများကိုလည်း ဆွေးနွေးခဲ့ကြကြောင်း သိရသည်။