FDA နှင့် ထပ်မံစစ်ဆေးမှုများလုပ်ဆောင်မည်
လူမှုကွန်ရက်မီဒီယာတွင် စားသုံးသူတစ်ဦးမှ တင်ခဲ့သော PEP နို့ခဲနှင့် ပတ်သက်သည့် Complaint တစ်ခုကို စစ်ဆေးမှုပြုလုပ်ခဲ့ရာတွင် စားသုံးသူမှတင်ထားသည့် ဗီဒီယို၊ ဓာတ်ပုံအရ နို့ခဲအတွင်း ပါလာသော ထိုပစ္စည်းသည် ထုပ်ပိုးမှုစက်ပစ္စည်းတွင်အသုံးပြုသည့် သန့်ရှင်းရေးကိရိယာမှ metal ချောင်းတစ်ခုဖြစ်သည်ဟု သံသယရှိကြောင်း PEP Myanmar က ယမန်နေ့က ထုတ်ပြန်ထားသည်။
စားသုံးသူအများပြည်သူများကို စိတ်ပူပန်စေခဲ့မှု၊ စိတ်အနှောင့်အယှက်ဖြစ်စေခဲ့မှုအပေါ် PEP ဝန်ထမ်းမိသားစုမှ အထူးဝမ်းနည်းစွာ တောင်းပန်ကြောင်းလည်း ဖော်ပြထားသည်။
ဤဖြစ်ရပ်အပေါ် တာဝန်ယူလက်ခံပြီး စစ်ဆေးရေးလုပ်ငန်းစဥ်များကို ပိုမိုတိုးမြှင့်ကာ ပြင်ဆင်ချက်များ ချမှတ်ထား၍ စတင်လုပ်ဆောင်လျက်ရှိကြောင်း သိရသည်။
FDA ကိုလည်း မိမိတို့ကိုယ်တိုင် ယနေ့ပင် အကြောင်းကြားပြီး မိမိတို့၏ ထုတ်လုပ်မှုကျင့်စဥ်အား ထပ်မံအစစ်ဆေးခံမည်ဖြစ်ကြောင်းလည်း အသိပေးထားသည်။
PEP Myanmar သည် FDA, HACCP နှင့် ISO စံနှုန်းများအရ အရည်အသွေးနှင့် ထုတ်လုပ်မှုစံချိန်စံညွှန်းများအတိုင်း တင်းကြပ်စွာ လိုက်နာကျင့်သုံးသွားမည့်အပြင် ယခုကိစ္စအားဖြစ်လေ့ဖြစ်ထရှိသည်ဟု မမှတ်ယူဘဲ တာဝန်ယူမှု တာဝန်ခံမှု အပြည့်ဖြင့် ကြိုးစားလုပ်ဆောင်မည်ဖြစ်ကြောင်း စားသုံးသူများအား ကတိကဝတ်ပြုထားကြောင်း သိရသည်။