ယနေ့ ဇွန်(၁၅)ရက် ညနေ (၄)နာရီအချိန် ၌ သုဝဏ္ဏအားကစားကွင်းအတွင်း ကျင်းပပြုလုပ်မည့် Myanmar Women’s League အဖွင့်ပွဲစဉ်တွင် ရှမ်းယူနိုက်နှင့် I.S.P.E FC အမျိုးသမီးအသင်းတို့ ယှဉ်ပြိုင်ကစားသွားကြမည်ဖြစ်သည်။
ယနေ့ ညနေပိုင်းတွင် စတင်ယှဉ်ပြိုင်ကစားမည့် Myanmar Women’s League 2026-27 ရာသီအဖွင့်ပွဲစဉ်သို့ လာရောက်အားပေးမည့် ဘောလုံးပရိသတ်များအတွက်လည်း အထူးကံစမ်းမဲအစီအစဉ်များ ထည့်သွင်းစီစဉ်ပေးထားကြောင်း မြန်မာအမျိုးသမီးလိဂ်ကော်မတီက အသိပေးထားသည်။
အဆိုပါ ကံစမ်းမဲဆုလက်ဆောင်များသည်ဘောလုံးပွဲလာရောက်ကြည့်ရှုသူများ အမှတ်တရဖြစ်စေရန်ရည်ရွယ်ပြီး၊
ကံစမ်းမဲတွင် Myanmar Women’s League 2026-27 တစ်ရာသီလုံး အခမဲ့ ကြည့်ရှုခွင့်၊ မြန်မာ့လက်ရွေးစင်အသင်း ဂျာစီ (၃) ထည်၊ Dong Luc Official Match Ball (၃) လုံးတို့ကို ပေးအပ်သွားမည်ဖြစ်ကြောင်း သိရသည်။
မဲဖောက်ပေးမည့်အချိန်ကို ယနေ့ပွဲစဉ် ၏ပထမပိုင်းအပြီး ပွဲရပ်နားချိန်တွင် ပြုလုပ်ပေးသွားမည်ဟုဆိုသည်။
ကွင်းဝင်ကြေးလက်မှတ်စျေးနှုန်းများအနေဖြင့် ပွဲကြည့်ရှုခွင့်နှင့် ကံစမ်းခွင့်အပါအတွက် ကျပ် ၃၀၀၀ ဖြစ်ကာ
ဝယ်ယူရရှိနိုင်မည့်နေရာများမှာ သုဝဏ္ဏဘောလုံးကွင်း၏ ဂိတ်အမှတ် (၂) နှင့် ဂိတ်အမှတ် (၆) တို့တွင် ဝယ်ယူအားပေးနိုင်ကြောင်း အသိပေးထားသည်။