လယ်ယာထွက်ကုန်ဈေးနှုန်း ထိန်းညှိရေးကော်မရှင် ဖွဲ့စည်းပေးရန် တိုက်တွန်းသည့်အဆိုကို ပြည်သူ့လွှတ်တော် အတည်ပြု

နေပြည်တော်၊ ဇွန် ၁၅

လယ်ယာ၊ ကိုင်းကျွန်းနှင့် ဥယျာဉ်ခြံမြေထွက်ကုန် သီးနှံများ၏ ဈေးနှုန်းတည်ငြိမ်ရေးအတွက် ဈေးနှုန်းထိန်းညှိရေးကော်မရှင်တစ်ရပ် ဖွဲ့စည်းဆောင်ရွက်ပေးရန် ပြည်ထောင်စုအစိုးရအဖွဲ့အား တိုက်တွန်းသည့်အဆိုကို ဇွန်လ ၁၅ ရက်က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး အဋ္ဌမနေ့တွင် အတည်ပြုခဲ့ကြောင်း သိရသည်။

အဆိုပါအဆိုကို အင်္ဂပူမဲဆန္ဒနယ်မှ ဒေါက်တာဌေးဝင်းက တင်သွင်းခဲ့ခြင်းဖြစ်ပြီး လယ်ယာထွက်ကုန် သီးနှံဈေးနှုန်းများ တည်ငြိမ်စေရေးနှင့် တောင်သူလယ်သမားများ အကျိုးစီးပွားကို ကာကွယ်ပေးနိုင်ရေးအတွက် သီးခြားကော်မရှင်တစ်ရပ် ဖွဲ့စည်းရန် တိုက်တွန်းခဲ့ခြင်းဖြစ်သည်။

ယင်းအဆိုကို လွှတ်တော်ကိုယ်စားလှယ် ၁၀ ဦးက ထောက်ခံဆွေးနွေးခဲ့ကြကြောင်း သိရသည်။

အဆိုနှင့်စပ်လျဉ်း၍ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲတင့်ထွန်းက တောင်သူလယ်သမားများ၏ အခွင့်အရေးနှင့် အကျိုးစီးပွားများကို ကာကွယ်မြှင့်တင်နိုင်ရန် “တောင်သူလယ်သမားအခွင့်အရေး ကာကွယ်ရေးနှင့် အကျိုးစီးပွားမြှင့်တင်ရေး ဦးဆောင်အဖွဲ့” ကို ဥပဒေနှင့်အညီ ဖွဲ့စည်းထားပြီးဖြစ်သဖြင့် အဆိုကို မှတ်တမ်းတင်ထားရှိသင့်ကြောင်း ရှင်းလင်းတင်ပြခဲ့သည်။

သို့သော် လွှတ်တော်၏ အဆုံးအဖြတ်ရယူရာတွင် ထောက်ခံမဲအများစု ရရှိခဲ့သဖြင့် ဒေါက်တာဌေးဝင်း တင်သွင်းသည့် အဆိုကို ပြည်သူ့လွှတ်တော်က အတည်ပြုခဲ့ကြောင်း သိရသည်။