ပုသိမ်၊ ဇူလိုင်-၁၄
A bank အနေဖြင့် MSME လုပ်ငန်းများအတွက် ဘဏ္ဍာရေးထောက်ပံ့မှုအဖြစ် သမားရိုးကျအာမခံပုံစံမျိုးမဟုတ်ဘဲ လုပ်ငန်းရှင်များ ခံသာနိုင်မည့် သီးခြားအာမခံပုံစံဖြင့် စီစဥ်ဆောင်ရွက်ပေးသွားမည်ဟု A Bank Public Company limited ဒုတိယအမှုဆောင်အရာရှိချုပ် ဦးမျိုးဝင်းသန်းက ပြောသည်။
၂၀၂၆ ခုနှစ် ဇူလိုင် ၁၄ ရက်က ပုသိမ်မြို့ရှိ ပုသိမ်ဟိုတယ်တွင် ဧရာဝတီတိုင်းဒေသကြီး စိုက်ပျိုးမွေးမြူရေးအခြေခံ MSMEs လုပ်ငန်းများ ဖွံ့ဖြိုးတိုးတက်ရေးအလုပ်ရုံဆွေးနွေးပွဲကျင်းပခဲ့ရာတွင် A Bank ၊ ဒုတိယအမှုဆောင်အရာရှိချုပ် ဦးမျိုးဝင်းသန်းက အထက်ပါအတိုင်း ပြောကြားခဲ့ခြင်းဖြစ်သည်။
အလုပ်ရုံဆွေးနွေးပွဲသို့ ဧရာဝတီတိုင်းဒေသကြီးဝန်ကြီးချုပ်ဦးအေးကျော်က တက်ရောက် အမှာစကားပြောကြားခဲ့ပြီး ဧရာဝတီတိုင်း ဒေသကြီး၏ စိုက်ပျိုးမွေးမြူရေး အခြေခံ MSME လုပ်ငန်းများ အမှန်တကယ် အောင်မြင် တိုးတက်စေရန် အစိုးရ၊ ပုဂ္ဂလိက ဘဏ်များနှင့် လုပ်ငန်းရှင်များ၊ ပညာရှင်များနှင့် အသင်းအဖွဲ့များအားလုံး ဟန်ချက်ညီညီ “လက်တွဲမဖြုတ်တမ်း” ဆက်လက်ပူးပေါင်း ဆောင်ရွက်သွားကြရန် တိုက်တွန်းပြောကြားသွားကြောင်း သိရသည်။
အဆိုပါအလုပ်ရုံဆွေးနွေးပွဲကို umfcci ဥက္ကဌဦးအေးဝင်း၊ ဒေါက်တာ ဦးမောင်မောင်သိမ်း နှင့် ဖိတ်ကြားထားသော လုပ်ငန်းရှင်များ တက်ရောက်ကြပြီး လုပ်ငန်းဖွံဖြိုးတိုးတက်ရေး နယ်ပယ်အလိုက် ဆွေးနွေးခဲ့ကြကာ UMFCCIဥက္ကဌဦးအေးဝင်းမှ (ARCCI) ဧရာဝတီတိုင်းကုန်သည်များနှင့် စက်မှုလက်မှုလုပ်ငန်းအသင်းဥက္ကဌ ဦးညီညီထွန်းအား အသင်းရုံးဆောက်လုပ်ရေး သိန်းတစ်ထောင် နှင့်အလှူရှင်များက အသီးသီး ဝိုင်းဝန်းလှူဒါန်းပေးခဲ့ကြောင်း သိရသည်။
ဧရာဝတီတိုင်းတွင် MSME လုပ်ငန်းပေါင်း ၅၅၀၀ ကျော်ရှိကြောင်းသိရပြီး လုပ်ငန်းအများစုအတွက် ရင်းနှီးမတည်ငွေအခက်အခဲမှာ အဓိကစိန်ခေါ်မှုအဖြစ် ရင်ဆိုင်နေရခြင်းဖြစ်သည်။