ပုဂ္ဂလိကကျောင်းအချို့ သတ်မှတ်ထားသည့် စံချိန်စံညွှန်းများနှင့် ကိုက်ညီမှုမရှိဟု ပြည်ထောင်စုဝန်ကြီး ဒေါက်တာချောချောစိန် ပြော

နေပြည်တော်၊ ဇူလိုင်-၁၃

ပညာရေးဝန်ကြီးဌာနလက်အောက်ရှိ ပုဂ္ဂလိကကျောင်းအချို့သည် သတ်မှတ်ထားသည့် စံချိန်စံညွှန်းများနှင့် ကိုက်ညီမှုမရှိသည်ကိုတွေ့ရှိရကြောင်း ပြည်ထောင်စုဝန်ကြီး ဒေါက်တာချောချောစိန်က ပြောသည်။

ကိုယ်ပိုင် သို့မဟုတ် ပုဂ္ဂလိကကျောင်းကြီးကြပ်ရေးအဖွဲ့နှင့် ပုဂ္ဂလိကကောလိပ်များ၊ နိုင်ငံတကာသင်ရိုးညွှန်းတမ်းဖြင့် သင်ကြားသောကျောင်းများနှင့် အမျိုးသားသင်ရိုးညွှန်းတမ်းဖြင့် သင်ကြားသောကျောင်းများမှ ကိုယ်စားလှယ်များ တွေ့ဆုံဆွေးနွေးပွဲကို ၂၀၂၆ ခုနှစ်၊ဇူလိုင် ၁၃ ရက်က နေပြည်တော်ရှိ ပညာရေးဝန်ကြီးဌာန၊ ရုံးအမှတ် ၁၃ ရှိ အစည်းအဝေးခန်းမတွင် ကျင်းပစဉ် ယင်းသို့ ထည့်သွင်းပြောကြားခဲ့ခြင်းဖြစ်သည်။

ပြည်ထောင်စုဝန်ကြီး ဒေါက်တာချောချောစိန်က ပုဂ္ဂလိကကျောင်းများတွင် သတ်မှတ်ထားသည့် စံချိန်စံညွှန်းများနှင့် ကိုက်ညီမှုမရှိသည်ကို တွေ့ရှိရသဖြင့် ကြိုတင်ပြင်ဆင်မှုများ ဆောင်ရွက်ထားရန် လိုအပ်ကြောင်း၊ ယခုပညာသင်နှစ်ကို ကျောင်းအင်္ဂါရပ်နှင့် စံချိန်စံညွှန်းအသစ်များအတွက် ပြင်ဆင်ချိန်အဖြစ် သတ်မှတ်ထားပြီး လာမည့်ပညာသင်နှစ်တွင် ကျောင်းများအနေဖြင့် လိုအပ်သည့် ပြင်ဆင်မှုများ ပြီးစီးထားရမည်ဖြစ်ကြောင်း ၎င်းက ဆိုသည်။

ထို့ပြင် ကျောင်းဖွင့်လှစ်ရာတွင် သတ်မှတ်ထားသည့် စာသင်ခန်းအရေအတွက်နှင့် ကျောင်းဧရိယာ အကျယ်အဝန်းများနှင့် ကိုက်ညီရမည်ဖြစ်ပြီး ကျောင်းတစ်ကျောင်း၏ လက်ခံနိုင်သည့် ကျောင်းသားဦးရေထက် ပိုမိုလက်ခံကာ နှစ်ချိန်စနစ်ဖြင့် သင်ကြားခြင်းကို လာမည့်နှစ်များတွင် လက်ခံမည်မဟုတ်ကြောင်းလည်း ၎င်းက ဆိုသည်။

ပုဂ္ဂလိကကျောင်းများတွင် ဘာသာရပ်သင်ကြားရေးသာမက စာရိတ္တနှင့် ပြည်သူ့နီတိ၊ ဘဝတွက်တာကျွမ်းကျင်မှုကဲ့သို့သော ဘာသာရပ်များကိုလည်း လျှော့ချခြင်းမပြုဘဲ သင်ကြားရန် လိုအပ်ကြောင်း၊ ကျောင်းသားကျောင်းသူများ၏ မျိုးချစ်စိတ်ဓာတ်နှင့် စည်းကမ်းကောင်းမွန်ရေးအတွက် နိုင်ငံတော်သီချင်းသီဆိုခြင်း၊ နိုင်ငံတော်အလံ အလေးပြုခြင်းနှင့် ဇာတိမာန်သီချင်းများ သီဆိုစေခြင်းတို့ကို ဆောင်ရွက်ပေးစေလိုကြောင်းလည်း ၎င်းက တိုက်တွန်းပြောကြားခဲ့သည်။

ထို့အပြင် ပုဂ္ဂလိကသင်ဆရာ ဆရာမများ၏ အရည်အသွေးတိုးတက်စေရန် လာမည့်နှစ်မှစတင်၍ ကိုးလသင်တန်း တက်ရောက်ပြီးသူများကိုသာ Green Card ထုတ်ပေးမည်ဖြစ်ကြောင်း၊ ကျောင်းအပ်နှံမှုစာရင်းများကို သတ်မှတ်စည်းမျဉ်းများနှင့်အညီ မြို့နယ်ပညာရေးမှူးရုံးများသို့ မှန်ကန်စွာ တင်ပြရမည်ဖြစ်ကြောင်းနှင့် နိုင်ငံတကာသင်ရိုးညွှန်းတမ်းဖြင့် သင်ကြားသောကျောင်းများမှ ကျောင်းသားကျောင်းသူများအတွက် ပြည်တွင်းတက္ကသိုလ်များသို့ ဝင်ခွင့်လျှောက်ထားနိုင်မည့် အခွင့်အလမ်းများရရှိစေရေး ဆောင်ရွက်လျက်ရှိကြောင်း ပြောကြားခဲ့သည်။