ဧရာဝတီ၊ ဩဂုတ် ၈
ဧရာဝတီတိုင်းဒေသကြီးအတွင်း ရေဘေးသင့် ဒေသခံပြည်သူများ ဆက်သွယ်ရေး မပြတ်တောက်စေရန်နှင့် ကယ်ဆယ်ရေးလုပ်ငန်းများ လွယ်ကူစေရန်အတွက် မြန်မာ့ဆက်သွယ်ရေးလုပ်ငန်း (MPT) က အခမဲ့ ဆက်သွယ်ရေးဝန်ဆောင်မှုများ ပေးအပ်လိုက်ကြောင်း သိရသည်။
MPT သုံးစွဲသူများအနေဖြင့် ယနေ့မှစ၍ (၇) ရက်အတွင်း အသုံးပြုနိုင်သည့် အခမဲ့ ဒေတာ 1 GB၊ MPT ချင်း အခမဲ့ဖုန်းခေါ်ဆိုခွင့် မိနစ် ၁၀၀ နှင့် အခမဲ့ SMS အစောင် ၁၀၀ တို့ကို ရရှိမည်ဖြစ်သည်။
ထို့ပြင် ငဝန်မြစ်ရေကြီးမှုကြောင့် ရေဘေးသင့်ခဲ့သည့် လေးမျက်နှာမြို့နယ်၊ စာရေးကွင်းဘုန်းတော်ကြီးကျောင်းနှင့် ဆိတ်နို့ကုန်းကျေးရွာ ရေဘေးကယ်ဆယ်ရေးစခန်းတို့တွင် ဂြိုဟ်တုဆက်သွယ်ရေးစက်ပစ္စည်း (Satellite Terminal) စုစုပေါင်း နှစ်စုံ တပ်ဆင်ပေးခဲ့သည်။ စာရေးကွင်းကျေးရွာတွင် ရွေ့လျားမိုဘိုင်းလ်စခန်း (Cell on Wheel – COW) ကိုလည်း ထပ်မံတပ်ဆင်ပေးထားသဖြင့် မိုဘိုင်းလ်ဖုန်းနှင့် အင်တာနက်လိုင်းများ မပြတ်တောက်ဘဲ ပြန်လည်အသုံးပြုနိုင်ပြီဖြစ်ကြောင်း သိရသည်။