MOU လုပ်သားများ အချက်အလက်နှင့်တကွ နိုင်ငံကူးလက်မှတ်လျှောက်ထားနိုင်

ပြည်ပသို့ MOU စနစ်ဖြင့် သွားရောက်အလုပ်လုပ်ကိုင်မည့် အလုပ်သမားများ အချက်အလက်စုံလင်စွာ ပြသနိုင်ပါက နိုင်ငံကူးလက်မှတ်လျှောက်ထားနိုင်ကြောင်း သိရသည်။

“ ခုချိန်လုပ်လို့ရတာ ဗုဒ္ဓဂါယာဘုရားဖူးအတွက်(PV) နှင့် ပြည်ပအတွက်စေလွှတ်မယ့် MOU သမား (PJ) သာလုပ်လို့ရသေးတာ။ အဲဒါတွေကလည်း သူတို့ခွင့်ပြုထားတဲ့ ခရီးသွားအေဂျင်စီနဲ့ ပြည်ပအလုပ်အကိုင်လိုင်စင်ရအေဂျင်စီတွေကနေ သက်ဆိုင်ရာဌာနကို အထောက်အထားအစုံနဲ့ စာတင်ပြီးဟိုဘက်က ခွင့်ပြုမိန့်ကျမှ လုပ်လို့ရတာ။ ဒီတိုင်းလွယ်လွယ်လုပ်မရပါဘူး” ထိုင်းနိုင်ငံတွင် အလုပ်သွားရောက်လုပ်ကိုင်မည့် ကိုဇော်မင်းထွေးက ပြောသည်။

အလုပ်သမားညွှန်ကြားမှုဦးစီးဌာန၏ ခွင့်ပြုပြီး အလုပ်ခေါ်စာနှင့် စေလွှတ်မည့် အလုပ်သမားများအပါအဝင် နိုင်ငံကူးလက်မှတ်ပြုလုပ်ခွင့်ကို ပြီးခဲ့သည့် ဇန်နဝါရီလ ၁၇ ရက်မှစပြီး ယာယီရပ်ဆိုင်းထားခြင်းဖြစ်သည်။

ပြည်ပကိုသွားရောက်လုပ်ကိုင်မည့်အလုပ်သမားများ နိုင်ငံကူးလက်မှတ်ပြုလုပ်ခွင့် ပိတ်ထားခြင်းကြောင့် တရားမဝင်သွားရောက်မှုများ ယခင်ထက်ပိုများလာကြောင်းအလုပ်သမားအရေးဆောင်ရွက်ပေးသူတွေထံကနေ သိရသည်။

“ကျွန်မတို့ကတော့ ပုံမှန်စေလွှတ်နေပါတယ်။ အရင်စာချုပ်ချုပ်ပြီးသား သူတွေကိုပေါ့။ ပတ်စ်ပို့ရှိရင် ကျွန်မတို့ဘက်က စာချုပ်ချုပ်ပေးပါတယ်။ အခုလည်း ပတ်စ်ပို့တွေပြန်ဖွင့်ပေးနေပြီ။ လုပ်လို့ရပါတယ်”ဟု ပြည်ပအလုပ်အကိုင်ရှာဖွေရေးအေဂျင်စီတစ်ခုဖြစ်သည့် အေးလင်းလက်ထွဋ်ဝန်ဆောင်မှုကုမ္ပဏီလီမိတက်မှ တာဝန်ရှိသူတစ်ဦးက ပြောသည်။

ပြည်တွင်းအလုပ်အကိုင်ရှားပါးလာခြင်းကြောင့် ပြည်ပထွက်ခွာအလုပ်လုပ်မည့်သူများ ပိုများလာပြီး ထိုင်းနှင့်မလေးရှားသို့ သွားရောက်သူပိုများကြောင်း၊ ယင်းအပြင် နိုင်ငံကူးလက်မှတ် (ပတ်စ်ပို့)တွေကို ဇန်နဝါရီလကုန်တွင် ပြန်လည်ပြုလုပ်ပေးသွားမည်ဟု သတင်းများထွက်ပေါ်နေသော်လည်း လက်ရှိအချိန်ထိ ဖွင့်လှစ်ခြင်းမရှိသေးကြောင်း သိရသည်။