လေကြောင်းလုပ်ငန်းကို စိတ်ဝင်စားပြီး လေယာဉ်မှူးတစ်ယောက်အဖြစ် အိပ်မက်ကို အကောင်အထည်ဖော်လိုသူများအတွက် ရည်ရွယ်၍ အနာဂတ်လေယာဉ်မှူးများအတွက် Cadet Pilot Program ကို မြန်မာအပြည်ပြည်ဆိုင်ရာလေကြောင်း (MAI) နှင့် အင်ဒိုနီးရှားနိုင်ငံရှိ Perkasa Flight School တို့ ပူးပေါင်း၍ ဖွင့်လှစ်သင်ကြားသွားမည်ဖြစ်ကြောင်း MAI မှ သိရသည်။
အဆိုပါ Cadet Pilot Program တွင် Ground School သင်တန်းများ၊ လက်တွေ့ Flight Training များနှင့် Simulator Training များကို ပေါင်းစပ်သင်ကြားပေးမည်ဖြစ်ပြီး လေယာဉ်မှူးတစ်ဦးအဖြစ် ရပ်တည်နိုင်ရန် လိုအပ်သည့် အသိပညာ၊ ကျွမ်းကျင်မှုနှင့် လေကြောင်းဆိုင်ရာ စည်းမျဉ်းစည်းကမ်းများကို အပြည့်အဝ လေ့လာသင်ယူနိုင်မည်ဖြစ်ကြောင်း သိရသည်။
ထို့အပြင် နည်းစနစ်ကျသော လေယာဉ်မှူးလေ့ကျင့်ရေးအစီအစဉ်၊ နိုင်ငံတကာအဆင့်မီ သင်ရိုးညွှန်းတမ်းများနှင့် လေယာဉ်မှူးအဖြစ်သို့ တက်လှမ်းနိုင်မည့် အခွင့်အလမ်းများကိုလည်း ရရှိနိုင်မည်ဖြစ်သည်။
Program ကာလအတွင်း စွမ်းဆောင်ရည်ကောင်းမွန်သော သင်တန်းသားများကို MAI ၏ သတ်မှတ်ထားသော အလုပ်ခန့်အပ်မှုဆိုင်ရာ စည်းမျဉ်းစည်းကမ်းများနှင့်အညီ လေယာဉ်မှူးအဖြစ် ခန့်အပ်ရာတွင် ဦးစားပေးစဉ်းစားသွားမည်ဖြစ်ကြောင်းလည်း သိရသည်။