အိန္ဒိယနိုင်ငံသို့ ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန်လ ၃ ရက် နံနက်ပိုင်းက မွမ်ဘိုင်းမြို့၏ အထင်ကရ သမိုင်းဝင် အဆောက်အအုံတစ်ခုဖြစ်သည့် Gateway of India အား သွားရောက်ကြည့်ရှုလေ့လာခဲ့သည်။
ထိုသို့ ကြည့်ရှုလေ့လာရာတွင် တာဝန်ရှိသူများက Gateway of India ၏ သမိုင်းကြောင်း၊ ဗိသုကာလက်ရာဆိုင်ရာ ထူးခြားချက်များနှင့် ခရီးသွားလုပ်ငန်း ဖွံ့ဖြိုးတိုးတက်ရေးအတွက် အထင်ကရနေရာတစ်ခုအဖြစ် ဆောင်ရွက်နေမှုများကို ရှင်းလင်းတင်ပြခဲ့ကြသည်။
ယင်းရှင်းလင်းတင်ပြချက်များအပေါ် နိုင်ငံတော်သမ္မတက သိရှိလိုသည်များကို ပြန်လည်မေးမြန်းဆွေးနွေးခဲ့ကြောင်း သိရသည်။
Gateway of India သည် အိန္ဒိယနိုင်ငံ၏ အထင်ရှားဆုံး သမိုင်းဝင် အထိမ်းအမှတ်အဆောက်အအုံများအနက် တစ်ခုဖြစ်ပြီး အာရေဗျပင်လယ်ကမ်းစပ်၌ တည်ရှိကာ မွမ်ဘိုင်းမြို့၏ အမှတ်အသားနေရာတစ်ခုအဖြစ် ထင်ရှားလျက်ရှိသည်။ အဆိုပါ အဆောက်အအုံကို ၁၉၁၁ ခုနှစ်တွင် ဘုရင် George V နှင့် ဘုရင်မ Mary တို့ အိန္ဒိယနိုင်ငံသို့ လာရောက်ခဲ့ခြင်းအား ဂုဏ်ပြုရန် ရည်ရွယ်၍ တည်ဆောက်ခဲ့ခြင်းဖြစ်ကြောင်း သိရသည်။
