ရန်ကုန်မြို့နဲ့ မဝေးတဲ့ ကျောက်တန်းမြို့မှာရှိတဲ့ ပီလခတ် ဟိန္ဒူဘုရားကျောင်းဟာ မြန်မာနိုင်ငံရဲ့ သက်တမ်းအရင့်ဆုံးဟိန္ဒူဘုရားကျောင်းဖြစ်ပါတယ်။
ပီလခတ် ဟိန္ဒူဘုရားကျောင်းဟာ ဆုတောင်းပြည့်တယ်လို့ ကျော်ကြားတဲ့အတွက် လာရောက်အဓိဌာန်ပြု ဆုတောင်းသူတွေနဲ့ မပြတ်စည်ကားနေတာပါ။
ကျောက်တန်းမြို့ကို လာရောက်ကြတဲ့ ဘုရားဖူးဧည့်သည်အများစုဟာ ကျောက်တန်းရေလယ်ဘုရားကို လာရောက်ရင်း လမ်းခရီးမှာရှိတဲ့ ပိလခတ်ဟိန္ဒူဘုရားကျောင်းကြီးဆီကိုပါ ဝင်ရောက်လေ့လာလေ့ရှိကြပါတယ်။
အခုလို မိုးမကျတကျ ရာသီဥတုအေးအေးလေးမှာ ရန်ကုန်မြို့ပြကနေ နာရီပိုင်းမျှသာ သွားရတဲ့ ဒေသတွင်း တစ်နေ့တာ အပန်းဖြေဘုရားဖူး (Day Trip) ခရီးစဉ်အဖြစ် သွားရောက်ကြသူတွေလည်း ရှိပါတယ်။
ပီလခတ်ဟိဒ္ဒူဘုရားကျောင်းကို အလုပ်ကိစ္စ၊ ကျောင်းကိစ္စနဲ့ သားဆုပန်ဖို့အတွက် ဘုရားဖူးတွေက ရာသီမရွေး လာရောက်ကြတာဖြစ်ပါတယ်။
“တချို့တွေကကျတော့ မနက်ပိုင်းမှာ အရင်ဆုံး ရွှေတိဂုံဘုရားဖူးကြတယ်။ ပြီးရင် ဗဟန်း(၃)လမ်းကနေ ၉၅ စီးတယ်။ ၉၅ ယာဥ်လိုင်းက ဗဟန်း(၃)လမ်းမှာ ဂိတ်စတယ်လေ။ ၉၅ စီးပြီးသွားရင် ကျောက်တန်းက ပီလခတ်ဘုရားကျောင်းကို တန်းရောက်တယ်။ အများစုက ပြည်ပကိုသွားမယ့်သူတွေ၊ သားသမီးရဖို့ ဆုပန်ချင်သူတွေ၊ အိမ်ခြံမြေကိစ္စ စသဖြင့်ပေါ့၊ အဓိဌာန်ပြုဆုတောင်းဖို့ သွားကြတာဖြစ်ပါတယ်”လို့ ရန်ကုန်မြို့မှ ပြည်သူတစ်ဦးက ပြောပြပါတယ်။
ဘုရားကျောင်းကိုလာတဲ့ ဘုရားဖူးတွေကို သားသတ်လွတ်ဟင်းနဲ့ ထမင်းချက်ပြုတ်ခါ စတုဒီသာ ကျွေးခြင်း များလည်းရှိပါတယ်။
ပိလခတ်နွားလွှတ်ပွဲတော်လို့ ခေါ်တဲ့ တမီးလ်လူမျိုးများရဲ့ ရိုးရာနွားလွှတ်ပွဲတော်ကို ၂၀၂၆ ခုနှစ် ဇန်နဝါရီ ၁၇ ရက်နေ့က ကျင်းပခဲ့ပါတယ်။ နွားလွှတ်ပွဲတော်ကို နှစ်စဉ်ကျင်းပနေတာဖြစ်ပါတယ်။
ရှေးဟောင်းဗိသုကာလက်ရာနဲ့ ယဉ်ကျေးမှု၊ သဟဇာတဖြစ်မှုတွေကြောင့် ပိလခတ်ကျေးရွာမှာရှိတဲ့ ဟိန္ဒူဘုရားကျောင်းကြီးဟာ မြန်မာနိုင်ငံမှာရှိတဲ့ ဟိန္ဒူဘုရားကျောင်းတွေထဲမှာ ဗိသုကာလက်ရာ ထူးခြားခန့်ညားထည်ဝါမှုကြောင့် နာမည်ကျော်ကြားတဲ့ ဘုရားကျောင်းကြီးဖြစ်ပါတယ်။
ဘုရားကျောင်းရဲ့ မျှော်စင်ဂိုပူရမ် (Gopuram) ပေါ်က သက်ဝင်လှုပ်ရှားနေသကဲ့သို့ ထုဆစ်ထားတဲ့ နတ်မင်းကြီးများ၊ နတ်သမီးများနှင့် ရုပ်တုများရဲ့ လက်ရာမြောက်ပုံတွေက ဘာသာခြား၊ လူမျိုးခြားများပါမကျန် လာရောက်လေ့လာ ဓာတ်ပုံရို-က်ကူးနိုင်တဲ့ ယဉ်ကျေးမှုပေါင်းကူးနေရာတစ်ခုလည်း ဖြစ်ပါတယ်။
စိမ်းလန်းစိုပြည်တဲ့ သစ်ပင်ကြီးတွေရှိခြင်းနှင့် ရှေးဟောင်းရုပ်တုများရဲ့ တည်နေရာထားရှိမှုတွေဟာ စွမ်းအင် (Energy) စီးဆင်းမှု ကောင်းမွန်စေပြီး လာရောက်သူတွေကို စိတ်အေးချမ်းမှု ပေးစွမ်းနိုင်တာလည်း အမှန်ပါပဲ။
ခုလိုမိုးဦးကျကာလမှာ ကျောက်တန်းမြို့က သမိုင်းဝင် ပိလခတ် ဟိန္ဒူဘုရားကျောင်းကြီးကို သွားရတာဟာ အဓိဌာန်ပြုသူတွေအတွက် ဆုတောင်းပြည့်သလိုတစ်နေ့တာ စိတ်အပန်းဖြေရာဆ်ိုရင်လည်း စိတ်အေးချမ်းပျော်ရွှင်ရတဲ့ ခရီးစဉ်လေးတစ်ခုဖြစ်မယ်လို့ယုံကြည်ပါတယ်။