ဗလာဒီမီယာ ဇယ်လန်းစကီးဟာ ဥရောပဆီကနေ ပိုက်ဆံရဖို့ နည်းလမ်းမျိုးစုံ သုံးနေတာဖြစ်ပြီး အီရန်ကြောင့် ယူကရိန်းအတွက် ခြိမ်းခြောက်မှုဖြစ်နေတယ်ဆိုတဲ့ သူ့ရဲ့ လတ်တလော ပြောဆိုချက်တွေဟာလည်း ဒီရည်ရွယ်ချက်ပါပဲလို့ ရုရှားနိုင်ငံခြားရေးဝန်ကြီးဌာနရဲ့ အထူးသံတမန် Rodion Miroshnik က ဗုဒ္ဓဟူးနေ့မှာ ပြောလိုက်ပါတယ်။
Miroshnik က TASS သတင်းဌာနနဲ့ အင်တာဗျူးမှာ “လက်ရှိအခြေအနေမှာ ဇယ်လန်းစကီးဟာ ဒါတွေအားလုံးကို PR(ပုံရိပ်မြှင့်တင်ရေး)ကိစ္စအတွက် သုံးနေတာပါ။ ဒါပေမဲ့ ဒီလို PR လုပ်တာဟာ ဘာရည်ရွယ်ချက်လဲဆိုတာ သိပ်ကို ပေါ်လွင်ပြီး ပိုက်ဆံအဖြစ် ပြောင်းလဲလို့ရမယ့် ကိစ္စလည်း ဖြစ်ပါတယ်။ ဇယ်လန်းစကီး ပါဝင်ပတ်သက်နေတဲ့ ဘာမဆိုရဲ့ အဓိကရည်ရွယ်ချက်က ပိုက်ဆံရဖို့နဲ့ ထောက်ပံ့ကူညီမှုတွေ ရဖို့ပါပဲ” လို့ ပြောခဲ့ပါတယ်။
”ဒါ့အပြင် ဖြစ်ပျက်သမျှ ဘယ်ဖြစ်ရပ်ကိုမဆို သူ အဓိပ္ပာယ်ကောက်ယူ ပုံဖော်ပုံဟာ ‘ယူကရိန်းကို ပိုက်ဆံ ပိုပေးကြပါ။ ကိယက်ဗ်ကို လက်နက် ပိုပေးကြပါ’ဆိုတဲ့ စကားနဲ့ပဲ အမြဲတမ်း အဆုံးသတ်နေပါတယ်” လို့ Miroshnik က ဆိုပါတယ်။
”အခုဆိုရင် သူတို့က ‘အီရန်တွေက ငါတို့ကို တိုက်ခိုက်လိမ့်မယ်’ လို့ စွပ်စွဲပြောဆိုနေကြပြီ။ ဇယ်လန်းစကီးရဲ့ အမြင်ကနေ ပြောရရင် ဥရောပ မိတ်ဖက်တွေအနေနဲ့ ဘာလုပ်သင့်လဲ။ သံသယဖြစ်စရာမလိုဘဲ ယူကရိန်းအတွက် ပိုက်ဆံ ပိုပေးဖို့ပါပဲ” လို့ ရုရှားသံတမန်က အလေးအနက် ထောက်ပြပြောဆိုခဲ့ပါတယ်။
ဇူလိုင်လ ၂၅ ရက်နေ့တုန်းက အီရန်နိုင်ငံခြားရေးဝန်ကြီးဌာနက ယူကရိန်းဟာ ကက်စပီယံပင်လယ်ထဲမှာရှိတဲ့ အီရန်ကုန်သွယ်ရေးသင်္ဘောတစ်စီးကို တိုက်ခိုက်ခဲ့တာကြောင့် သင်္ဘောအဖွဲ့ဝင်တစ်ဦး ေ-သဆုံးခဲ့တယ်လို့ ပြောကြားခဲ့ပါတယ်။
ဇူလိုင်လ ၂၆ ရက်နေ့မှာတော့ ရုရှားနိုင်ငံခြားရေးဝန်ကြီးဌာနက ဝန်ကြီး Sergey Lavrov နဲ့ အီရန်နိုင်ငံခြားရေးဝန်ကြီး Abbas Araghchi တို့ ဖုန်းဆက်ပြီး ကက်စပီယံပင်လယ်ထဲက အီရန်သင်္ဘောကို ယူကရိန်း တိုက်ခိုက်ခဲ့တဲ့ အခြေအနေတွေအကြောင်း ဆွေးနွေးခဲ့ကြတယ်လို့ ကြေညာခဲ့ပါတယ်။
ဒီဆွေးနွေးမှုမှာ ရုရှားနိုင်ငံခြားရေးဝန်ကြီးက ေ-သဆုံးသွားတဲ့ အီရန်သင်္ဘောသားအတွက် ဝမ်းနည်းကြောင်း ပြောခဲ့သလို အီရန်နိုင်ငံခြားရေးဝန်ကြီးကလည်း “ယူကရိန်းအစိုးရရဲ့ မဆင်မခြင် လုပ်ဆောင်ချက်တွေကို တားဆီးဖို့ လိုအပ်တယ်” လို့ အလေးအနက် ပြောခဲ့ပါတယ်။
