ရန်ကုန်တက္ကသိုလ် စိန်ရတုခန်းမ ပြန်လည်ဖွင့်လှစ်ရန် ပြင်ဆင်နေ

ရန်ကုန်၊ဇူလိုင်-၂၉

ရန်ကုန်တက္ကသိုလ် စိန်ရတုခန်းမကို ပြန်လည်ဖွင့်လှစ်နိုင်ရန်အတွက် ပြင်ဆင်မှုများကို ပြုလုပ်နေကြောင်း မေးမြန်းချက်များအရ သိရသည်။

ရန်ကုန်တက္ကသိုလ် စိန်ရတုခန်းမကို ၂၀၂၀ ပြည့်နှစ် ဒီဇင်ဘာလ ၁ ရက်နေ့တွင် ကျရောက်ခဲ့သည့် ရန်ကုန်တက္ကသိုလ်နှစ်(၁၀၀) ပြည့် ရာပြည့်ပွဲတော်အမီ ပြန်လည်မွမ်းမံပြင်ဆင်ရန်အတွက် ၂၀၁၉ ခုနှစ် အောက်တိုဘာလ ၁ ရက်နေ့မှ စတင်၍ ခေတ္တပိတ်ထားခဲ့ခြင်း ဖြစ်ကြောင်း သိရသည်။

ပြန်လည်ပြုပြင်မွမ်းမံမှုများ ပြီးစီးသွားခဲ့သော်လည်း ထိုစဉ်က ကိုဗစ်-၁၉ (COVID-19) ကပ်ရောဂါ အခြေအနေများနှင့် နောက်ပိုင်း နိုင်ငံရေးအပြောင်းအလဲများကြောင့် အများပြည်သူဆိုင်ရာ အခမ်းအနားများ ကျင်းပခြင်းကို ကန့်သတ်ထားခဲ့သည်။

ယခုအခါ ၆ နှစ်ကျော်ကြာပြီးနောက် ပြန်လည်ဖွင့်လှစ်နိုင်ရန်အတွက် ပြင်ဆင်မှုများကိုပြုလုပ်နေပြီဖြစ်သည်။

ရန်ကုန်တက္ကသိုလ် စိန်ရတုခန်းမသည် ၁၉၉၅ ခုနှစ် ဒီဇင်ဘာလတွင် ကျရောက်ခဲ့သော ရန်ကုန်တက္ကသိုလ် ၇၅ နှစ်ပြည့် စိန်ရတုသဘင် အထိမ်းအမှတ်အဖြစ် တည်ဆောက်ခဲ့သည့် အဆောက်အအုံ ဖြစ်ပြီး ကမာရွတ်မြို့နယ် ပြည်လမ်းဘက်တွင် တည်ရှိသည်။

၁၉၉၅ ခုနှစ် ဒီဇင်ဘာ ၁ ရက်နေ့မှစ၍ ရန်ကုန်တက္ကသိုလ် စိန်ရတုသဘင်ပွဲတော်ကို တစ်ပတ်ကြာ ကျင်းပခဲ့သည်။

အဆိုပါ စိန်ရတုခန်းမကို နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့(န-ဝ-တ) အစိုးရမှ ကျပ်သိန်း ၆၃၀ အကုန်အကျခံကာ စိန်ရတုအထိမ်းအမှတ်အဖြစ် အဆိုပါခန်းမကို ဆောက်လုပ်ခဲ့ကြောင်း သိရသည်။