ဇွန်လအတွင်း ကျင်းပပြုလုပ်မည့် AYA Tri-Nation Cup 2026 ဖိတ်ခေါ်ဘောလုံးပြိုင်ပွဲတွင် ပါဝင်ယှဉ်ပြိုင်ရန်အတွက် ဥဇဘတ်ကစ္စတန် အမျိုးသမီး အမျိုးသားလက်ရွေးစင်ဘောလုံးအသင်းသည် ယမန်နေ့ မွန်းလွဲပိုင်းက မြန်မာနိုင်ငံ ရန်ကုန်မြို့သို့ လေကြောင်းခရီးဖြင့် ရောက်ရှိလာခဲ့ပြီ ဖြစ်သည်။
မြို့တော် တက်ရှ်ကန့် (Tashkent) မှ ရန်ကုန်မြို့သို့ မိုင်ပေါင်း ၂,၃၂၀ ကျော် ခရီးနှင်လာခဲ့ရသည့် ဥဇဘတ်ကစ္စတန် အသင်းသည် ရန်ကုန်မြို့သို့ ရောက်ရှိပြီးနောက် ညနေပိုင်းမှာပင် သုဝဏ္ဏကွင်းရှိ MFF Training Pitch-1 ၌ အပေါ့စား ကြံ့ခိုင်မှု လေ့ကျင့်ရေးအစီအစဉ်များကိုစတင် ပြုလုပ်လျက်ရှိကြောင်း သိရသည်။
အင်အားတောင့်တင်းသည့် ဥဇဘတ်ကစ္စတန် အမျိုးသမီးအသင်းသည် ယခုပြိုင်ပွဲတွင် အိမ်ရှင်မြန်မာအသင်း၊ ဒေသတွင်းအင်အားကြီး ထိုင်းအသင်းတို့နှင့် အကြိတ်အနယ် ယှဉ်ပြိုင်သွားကြမည်ဖြစ်သည်။
ပွဲစဉ်များအဖြစ် ဇွန်လ (၃)ရက် ညနေ (၅) နာရီတွင် မြန်မာနှင့် ဥဇဘတ်ကစ္စတန် (အဖွင့်ပွဲစဉ်)၊ ဇွန်လ (၆)ရက် ညနေ (၅) နာရီတွင် ထိုင်း နှင့် ဥဇဘတ်ကစ္စတန်တို့ ယှဉ်ပြိုင်ကစားကြမည်ဖြစ်သည်။
“မြင်းရိုင်းမလေးများ”ဟု တင်စားကြသည့် ဥဇဘတ်ကစ္စတန်အသင်းနှင့် အိမ်ရှင် မြန်မာအမျိုးသမီးအသင်းတို့၏ အဖွင့်ပွဲစဉ်သည် ပရိသတ်များ စိတ်ဝင် စားမှုအခံရဆုံး ပွဲတစ်ပွဲ ဖြစ်လာရန် ရှိနေသည်။
အဆိုပါ AYA Tri-Nation Cup 2026 ပြိုင်ပွဲသည် သုံးနိုင်ငံအမျိုးသမီးအသင်းများအတွက် နောက်ထပ် နိုင်ငံတကာပြိုင်ပွဲကြီးများမတိုင်မီ အချင်းချင်း ခြေစွမ်းတိုးတက်မှုကို တိုင်းတာနိုင်မည့် အခွင့်အရေးကောင်းတစ်ခုလည်း ဖြစ်သည်။