Category: Movies

မြန်မာအားကစားမယ် ခင်နှင်းဝေသည် စက်တင်ဘာ ၂၀ ရက်က ယှဉ်ပြိုင်ခဲ့သည့် တက်ဂ်ဘော (Teqball) အမျိုးသမီးတစ်ဦးချင်း ဗိုလ်လုပွဲတွင် အင်ဒိုနီးရှားကစားသမား ဆူမာယာကို ၂ ပွဲ ၁ ပွဲဖြင့် အနိုင်ယူကာ ရွှေတံဆိပ်ဆု ဆွတ်ခူးနိုင်ခဲ့သည်။ အဆိုပါဗိုလ်လုပွဲကို ဘာစီလိုနာနှင့် စပိန်လက်ရွေးစင်အသင်းတို့၏ ဂန္တဝင်နောက်ခံကစားသမား ကားလက်စ် ပူယိုးလ် (Carles Puyol) ကိုယ်တိုင် လာရောက်ကြည့်ရှုအားပေးခဲ့သည်။ ခင်နှင်းဝေသည် ဗိုလ်လုပွဲ ပထမပွဲတွင် ၁၀-၁၂ ဖြင့် ရှုံးနိမ့်ခဲ့သော်လည်း ဒုတိယနှင့် တတိယပွဲတို့တွင် ၁၂-၈၊ ၁၂-၉ ရလဒ်များဖြင့် ပြန်လည်အနိုင်ယူနိုင်ခဲ့ကာ ချန်ပီယံဖြစ်လာခဲ့ခြင်းဖြစ်သည်။ “ကျွန်မ အရမ်းဝမ်းသာပါတယ်။ ကျွန်မအပေါ် ယုံကြည်မှုထားပြီး အမျိုးသမီးတစ်ဦးချင်းပြိုင်ပွဲမှာ ဝင်ရောက်ယှဉ်ပြိုင်ဖို့ ရွေးချယ်ပေးခဲ့တဲ့ နည်းပြချုပ်ကို ကျေးဇူးတင်ပါတယ်။ ကျွန်မလုပ်နိုင်မယ်ဆိုတာကို ယုံကြည်ခဲ့ပါတယ်” ဟု ခင်နှင်းဝေက ပြောသည်။ ထို့ပြင် ၂၀၂၇ ခုနှစ် အရှေ့တောင်အာရှအားကစားပြိုင်ပွဲ (ဆီးဂိမ်းစ်) တွင်လည်း မြန်မာနိုင်ငံအတွက် ရွှေတံဆိပ်ဆု ရယူပေးနိုင်ရန် ရည်မှန်းထားကြောင်း ၎င်းက ပြောကြားခဲ့သည်။ တက်ဂ်ဘောသည် ဘောလုံးကစားနည်းနှင့် စားပွဲတင်တင်းနစ်ကစားနည်းတို့၏ သဘောတရားများကို ပေါင်းစပ်ဖန်တီးထားသည့် အားကစားနည်းဖြစ်ပြီး ကွေးညွတ်ထားသည့် အထူးစားပွဲကို အသုံးပြုကာ ဘောလုံးကို လက်ဖြင့်မထိဘဲ ကစားရခြင်းဖြစ်သည်။ အဆိုပါအားကစားနည်းသည် ဟန်ဂေရီနိုင်ငံတွင် စတင်ပေါ်ပေါက်ခဲ့ပြီး နောက်ပိုင်းတွင် နိုင်ငံတကာ၌ လျင်မြန်စွာပျံ့နှံ့လာကာ ၂၀၂၃ ခုနှစ် ဥရောပအားကစားပြိုင်ပွဲတွင်လည်း ထည့်သွင်းကျင်းပခဲ့သည်။ Ref: The Straits Times