ဟင်္သာတ၊ စက်တင်ဘာ ၂၀
ငဝန်မြစ်ရေ တိုက်စားမှုကြောင့် ငဝန်တာ၏ အောက်ခံ မြစ်ကျိုးအင်း သဲကြောမှ ထူးပေါက်၍ တာတမံ နိမ့်ကျမှု ဖြစ်ပွားခဲ့ရာ လေးမျက်နှာမြို့နှင့် ဆက်စပ် မြို့၊ ရွာများသို့ ရေကျော် စီးဝင်ခြင်းမှ ကာကွယ်ရန် ဆောက်လုပ်ရေးဝန်ကြီးဌာနက Steel Sheet Pile များ ရိုက်သွင်း ကာရံလျက် ရှိသည်။
အဆိုပါရေကျော်စီးဝင်နေသည့် ငဝန်မြစ်သည် ရေစီးသန်ပြီး ယခင်ရေနည်းနေသည့်အချိန်တွင်ပင် ရေအနက်သည် ၃၆ ပေခန့်ရှိသည်။ ၄င်း၏ မြစ်ကြမ်းပြင်သည် လူနေထိုင်ရာ ရပ်ကွက်များ၊ ကျေးရွာများနှင့် စိုက်ပျိုးမြေများထက် မြင့်နေသဖြင့် ရေဝင်ရောက်မှုကာကွယ်ရန် စက်၊ ယာဉ်၊ ယန္တရားများကို အသုံးပြု၍ Steel Sheet Pile များကို ရိုက်သွင်းပြီး ပိတ်ဆို့ကာရံခြင်းလုပ်ငန်းများ ဆောင်ရွက်ခဲ့သည်။
သို့သော် အထက်ပိုင်းဒေသမိုးရွာသွန်းမှုအခြေအနေအရ ရေအနက်မှာ ပေ ၄၀ အထိ ထပ်မံ မြင့်တက်ခဲ့သဖြင့် ကာရံပြီး Steel Sheet Pile အရှည်ပေ ၂၀၀ တွင် ငဝန်မြစ်ရေဝင်လမ်းကြောင်းရှိရာမှ ရေကျော်စီးဝင်ပြီး ရေစီးသန်သဖြင့် ပေ ၅၀ ခန့်ယိုင်သွားခဲ့သော်လည်း ရေစီးဝင်မှုအား ထိန်းထားနိုင်ခဲ့ကြောင်း သိရသည်။
အဆိုပါငဝန်မြစ်၏ လက်ရှိရေကျော်စီးဝင်နေမှုကို အပြီးသတ်တားဆီးနိုင်ရန်အတွက် ဆောက်လုပ်ရေးဝန်ကြီးဌာန၊ တံတားဦးစီးဌာန မှ Steel Sheet Pile ရိုက်ခြင်းလုပ်ငန်းများ ဆောင်ရွက်ပြီးနောက် ပိုမိုခိုင်ခံ့မှုရှိစေရန် ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ရေအရင်းအမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာနတို့ ဆက်လက်ပူးပေါင်းဆောင်ရွက်သွားရမည်ဖြစ်ကြောင်း သိရသည်။
သို့သော်လည်း လက်ရှိရေဝင်လမ်းကြောင်းကို Steel Sheet Pile Wall ဖြင့် အပြီးကာရံတားဆီးပြီးသည့်နောက် မြစ်ဘက်တွင်ရှိသည့်ရေ Level သည် မူလအတိုင်း ဆက်လက်ကျန်ရှိ စီးဆင်းနေမည်ဖြစ်ပြီး Steel Sheet Pile Wall ၏ မြို့ဖက်ခြမ်းတွင်ရှိသည့် ရေ Levelသည် တဖြည်းဖြည်းလျော့နည်းကျဆင်းသွားမည်ဖြစ်ကြောင်း ဆောက်လုပ်ရေးဝန်ကြီးဌာန တံတားဦးစီးဌာန၊ တံတားအထူးအဖွဲ့ (၁၆) မှ ဒုတိယညွှန်ကြားရေးမှူး (မြို့ပြ) ဦးကျော်မျိုးက ပေါ်ပြူလာနယူးစ်သို့ ပြောသည်။
“ ဒီလိုတစ်ဖက်က ရေထုလျော့ကျလာတဲ့အချိန်မှာ အခုကာရံလိုက်တဲ့ Steel Sheet Pile Wall တစ်လျှောက် မြစ်ရေထုရဲ့ ဖိအားဟာ မြစ်ဖက်ခြမ်းမှာ ဆက်လက်ရှိနေမှာဖြစ်လို့ သူ့ရဲ့နောက်ကျောဘက်ကနေ သဲအိတ်တွေ၊ Geo-bag တွေ ဖြည့်ခြင်းကို Sheet Pile ကာပြီး အမြန်ဆုံးဆောင်ရွက်ပေးမှသာ မြစ်ရေထုရဲ့ဖိအားကို Steel Sheet Pile Wall က ခံနိုင်ပြီး ကျိုးပေါက်လဲကျမှုမရှိဘဲ မြစ်ရေဝင်ရောက်မှုကို တားဆီးနိုင်မှာဖြစ်ပါတယ်””ဟု ဦးကျော်မျိုးက ဆိုသည်။