ဈေးလမ်းကလေး

0
231

ယာဉ်မ၀င်ဖို့ သတ်မှတ်ထားတဲ့
လမ်းကလေးတစ်လျှောက်မှာ
ရောင်းဝယ်ဖောက်ကားနေကြသူတွေနဲ့ စည်ကားလို့။

လမ်းကလေးက
ဈေးကလေးကို ကွေ့ဝိုက်သွားလို့မို့
သူလည်း ဒီလိုဈေးလမ်းလေးကို ဖြစ်လို့။

သူ့ဆီကို
သစ်သီးဝလံတွေ၊ အသီးအနှံတွေ
နှင်းဆီနီတွေ၊ စံပယ်ဖြူတွေ
ယူလာကြတယ်။
ရုပ်သံခွေတွေ၊ အ၀တ်အထည်တွေ
ကုန်စိမ်း ကုန်ခြောက်တွေ
ယူလာကြတယ်။

သား၊ ငါးနဲ့
ဟင်းရွက်တွေလည်း ယူလာကြတယ်။
သူ့ဝဲယာမှာ
အလှပြင်ဆိုင်၊ စားသောက်ဆိုင်နဲ့
အပ်ချုပ်ဆိုင် တချို့ကလည်း
စီရရီ။
သူ့လမ်းပေါ်မှာလည်း
မိန်းမငယ်၊ လူငယ်
အမျိုးသားကြီး၊ အမျိုးသမီးကြီးတွေက
အဆင်စုံ အသွေးစုံ
ဆင်ယင်ပုံစံ စုံနဲ့။

မတ်တပ်ရောင်းသူ
ထိုင်ရောင်းသူနဲ့
တချို့လည်း တွန်းလှည်းကလေးနဲ့
ဗန်းကလေးနဲ့။

ရောင်းကုန်ပြောသံ
ဈေးခေါ်သံနဲ့
ဈေးညှိသံတွေ
တဝေါဝေါ။

ကုန်နံ့၊ လူနံ့
ရာသီဥတု ရနံ့နဲ့
ဒီလမ်းကလေးကလေ
သက်ဝင်လှုပ်ရှားနေတော့တယ်။

လင်းထိန်


LEAVE A REPLY

Please enter your comment!
Please enter your name here