ဧရာဝတီတိုင်းဒေသကြီး၊ ငဝန်တာတမံ၏ မြစ်ကျိုးအင်း သဲကြောမှ ရေအောက်လှိုင်ခင်းသည့် ထူးပေါက်မှု (Sand Boil/Piping) ကြောင့် တာတမံ နိမ့်ကျဆုန့်ဝင်ကာ မြစ်ရေကျော်စီးဝင်နေခြင်းကို အမြန်ဆုံး ထိန်းနိုင်ရန် စက်လှေ ၁၃ စီး၊ ပူးပေါင်းအင်အား ၂၆၇ ဦးဖြင့် ၂၄ နာရီပတ်လုံး ဆောင်ရွက်နေကြကြောင်း ဧရာဝတီတိုင်းဒေသကြီးအစိုးရအဖွဲ့မှ သိရသည်။
တမံ ပျက်စီးမှု ပိုမိုမကြီးမားစေရန်နှင့် အနီးဝန်းကျင်ရှိ စိုက်ပျိုးမြေများ၊ ကျေးရွာများအတွင်းသို့ မြစ်ရေ ထပ်မံမဝင်ရောက်စေရန် Geo Bag (ဂျီအိုအိတ်) များကို အဓိကအသုံးပြု၍ ပြန်လည်ပြုပြင်နေရခြင်းဖြစ်သည်။
လက်ရှိတွင် သဲကြောမှ ရေစိမ့်ထွက်နေသည့် အပေါက်များကို သဲစုပ်သင်္ဘောနှင့် စက်ယန္တရားများသုံးကာ သဲဖြည့် Geo Bag အိတ်ကြီးများဖြင့် ရေအောက်အထိ ဖိသိပ်ချခြင်း၊ နိမ့်ကျသွားသည့် တာထိပ်ပြင်တစ်လျှောက် Geo Bag နှင့် သဲအိတ်များ ထပ်ဆင့်စီရီ၍ တာမြှင့်ခြင်းများ ဆောင်ရွက်လျက်ရှိသည်။
ထို့အပြင် ရေစီးသန်သည့် အပေါက်များတွင် ပိတောက်နှင့် သစ်လုံး ရေကာတားများ ရိုက်စိုက်၍ သဲ၊ ကျောက်ကြီးများဖြင့် ဖို့ဆို့လျက်ရှိပြီး နည်းပညာကျွမ်းကျင်သူများနှင့် တာဝန်ရှိသူများက ရေစီးကြောင်းအခြေအနေကို စက်ယန္တရား၊ ရေယာဉ်များဖြင့် ၂၄ နာရီ အလှည့်ကျ စစ်ဆေးဆောင်ရွက်နေကြောင်း ဧရာဝတီတိုင်းဒေသကြီးအစိုးရထံမှလည်း သိရသည်။