ဗန်ကောက်၊ ဩဂုတ် ၆
သဘာဝအရင်းအမြစ်များ ကြွယ်ဝပေါများပြီး စီးပွားရေးအလားအလာကောင်းများရှိသည့် မြန်မာနိုင်ငံ၌ EV ယာဉ်ထုတ်လုပ်ရေးအပါအဝင် ကဏ္ဍစုံတွင် လာရောက်ရင်းနှီးမြှုပ်နှံကြရန် ထိုင်းစီးပွားရေးလုပ်ငန်းရှင်များကို နိုင်ငံတော်သမ္မတ ဦးမင်းအောင်လှိုင်က ဖိတ်ခေါ်လိုက်သည်။
ထိုင်းနိုင်ငံသို့ တရားဝင်ခရီးစဉ်အဖြစ် ရောက်ရှိနေသည့် နိုင်ငံတော်သမ္မတက ယနေ့ ဩဂုတ် ၆ ရက် မွန်းလွဲပိုင်းတွင် ဗန်ကောက်မြို့ရှိ Queen Sirikit National Convention Center ၏ Plenary Hall ၌ ကျင်းပသည့် မြန်မာ–ထိုင်း စီးပွားရေးဖိုရမ် ၂၀၂၆ တွင် မိန့်ခွန်းပြောကြားစဉ် ယင်းသို့ ဖိတ်ခေါ်ခဲ့ခြင်းဖြစ်သည်။
မြန်မာနိုင်ငံသည် စိုက်ပျိုးရေးကို အခြေခံသည့်နိုင်ငံဖြစ်ပြီး ကြွယ်ဝသော သဘာဝအရင်းအမြစ်များနှင့် စီးပွားရေးအလားအလာကောင်းများ ပိုင်ဆိုင်ထားကြောင်း၊ နိုင်ငံ၏ဖွံ့ဖြိုးတိုးတက်ရေးလိုအပ်ချက်များကို ဖြည့်ဆည်းပေးနိုင်ရန် ပြည်တွင်းနှင့် ပြည်ပရင်းနှီးမြှုပ်နှံမှုများကို အလေးထားဖိတ်ခေါ်လျက်ရှိကြောင်း နိုင်ငံတော်သမ္မတက ပြောကြားသည်။
“စိုက်ပျိုးရေး၊ မွေးမြူရေးနဲ့ လယ်ယာအခြေခံကုန်ထုတ်လုပ်ငန်းတွေ၊ ပြန်လည်ပြည့်ဖြိုးမြဲစွမ်းအင် ထုတ်လုပ်ရေးလုပ်ငန်းတွေ၊ ပညာရေး၊ ကျန်းမာရေး၊ နည်းပညာနဲ့ ဒစ်ဂျစ်တယ်ဝန်ဆောင်မှုလုပ်ငန်းတွေမှာ လာရောက်ရင်းနှီးမြှုပ်နှံဖို့ ဖိတ်ခေါ်လိုပါတယ်။ ဓာတ်မြေဩဇာထုတ်လုပ်ရေး၊ အများပြည်သူသယ်ယူပို့ဆောင်ရေး၊ EV ယာဉ်ထုတ်လုပ်ရေး၊ ဘိလပ်မြေနဲ့ သံမဏိထုတ်လုပ်ရေး၊ စိုက်ပျိုးရေးနဲ့ မွေးမြူရေးအခြေခံ တန်ဖိုးမြင့်ထုတ်ကုန်တွေ ထုတ်လုပ်ရေး၊ ဆေးဝါးနဲ့ ဆေးဘက်ဆိုင်ရာပစ္စည်းကိရိယာတွေ ထုတ်လုပ်ရေးလုပ်ငန်းတွေကိုလည်း အားပေးဖိတ်ခေါ်နေပါတယ်” ဟု နိုင်ငံတော်သမ္မတက ပြောကြားသည်။
ထို့ပြင် ပြည်တွင်းကုန်ကြမ်းများကို အခြေခံသည့် အဆင့်မြင့်ရာဘာထုတ်လုပ်ရေး၊ ရာဘာအခြေခံပရိဘောဂနှင့် မော်တော်ယာဉ်တာယာထုတ်လုပ်ရေးလုပ်ငန်းများ ဖွံ့ဖြိုးတိုးတက်လာစေရန် အားပေးဆောင်ရွက်လျက်ရှိရာ အဆိုပါကဏ္ဍများ၌လည်း ထိုင်းစီးပွားရေးလုပ်ငန်းရှင်များအတွက် ရင်းနှီးမြှုပ်နှံနိုင်မည့် အခွင့်အလမ်းကောင်းများရှိကြောင်း ပြောကြားသည်။
“ထိုင်းနိုင်ငံဟာ အဆင့်မြင့်ကျန်းမာရေးဝန်ဆောင်မှုလုပ်ငန်းတွေ ထွန်းကားတဲ့နိုင်ငံဖြစ်တာကြောင့် နှစ်နိုင်ငံပူးပေါင်းဆောင်ရွက်မှုအနေနဲ့ မြန်မာနိုင်ငံရဲ့ ကျန်းမာရေးဝန်ဆောင်မှုကဏ္ဍမှာလည်း လာရောက်ရင်းနှီးမြှုပ်နှံကြဖို့ ဖိတ်ခေါ်လိုပါတယ်” ဟု နိုင်ငံတော်သမ္မတက ပြောကြားသည်။
နှစ်နိုင်ငံအကြား ကုန်သွယ်မှုနှင့် စီးပွားရေးပူးပေါင်းဆောင်ရွက်မှု မြှင့်တင်ရာတွင် သယ်ယူပို့ဆောင်ရေးနှင့် ဆက်သွယ်ချိတ်ဆက်မှုသည် အလွန်အရေးပါကြောင်း၊ အိန္ဒိယ–မြန်မာ–ထိုင်း သုံးနိုင်ငံအဝေးပြေးလမ်းမကြီးသည် နှစ်နိုင်ငံကုန်သွယ်မှုကိုသာမက ဧရာဝတီ–ကျောက်ဖရား–မဲခေါင် စီးပွားရေးပူးပေါင်းဆောင်ရွက်မှုမဟာဗျူဟာ (ACMECS) နှင့် အာဆီယံစီးပွားရေးစင်္ကြံတို့ကိုပါ ဖွင့်လှစ်ပေးမည့် အဓိကသော့ချက်ဖြစ်ကြောင်း နိုင်ငံတော်သမ္မတက ပြောကြားသည်။
ထို့ကြောင့် မြဝတီ၊ တာချီလိတ်နှင့် ကော့သောင်းစသည့် နယ်စပ်ဒေသများရှိ နယ်စပ်စီးပွားရေးဇုန်များ၊ ကုန်စည်ထောက်ပံ့ရေးနှင့် သယ်ယူပို့ဆောင်ရေးလုပ်ငန်းများတွင်လည်း ရင်းနှီးမြှုပ်နှံနိုင်မည့် အခွင့်အလမ်းကောင်းများရှိကြောင်း နိုင်ငံတော်သမ္မတ ဦးမင်းအောင်လှိုင်က ထိုင်းစီးပွားရေးလုပ်ငန်းရှင်များကို ဖိတ်ခေါ်ပြောကြားခဲ့သည်။