ခုတလော မြန်မာ့ရုပ်ရှင်ဇာတ်ကား ထုတ်လုပ်သူ ဒါရိုက်တာများနှင့် သရုပ်ဆောင် အချို့ဆင်ဆာအဖွဲ့ကို တော်တော် မကျေမနပ်ဖြစ်ကြကာ ဆင်ဆာမရှိသင့်ဟုပင် ပြောကြပါသည်။ ရုပ်ရှင်အစည်းအရုံးဥက္ကဋ္ဌ ဦးလူမင်းကလည်း ရုပ်ရှင်လောကသားများ တောင်းဆိုသောအချက်များအား ဝန်ကြီးနှင့်တွေ့စဉ်က တင်ပြခဲ့ပါသည်။ ဝန်ကြီးကလည်း ရုပ်ရှင်နှင့် ဗီဒီယိုဆင်ဆာအဖွဲ့သည် ဥပဒေဖြင့် ဖွဲ့စည်းထားသော အဖွဲ့ ဖြစ်၍ ဆင်ဆာအဖွဲ့အနေနှင့် မရှိလို့ မဖြစ်ပါကြောင်း၊ ဆင်ဆာအဖွဲ့ ဖွဲ့ရန်မလိုပါက ရုပ်ရှင်ဥပဒေနှင့် ရုပ်မြင်သံကြား ဗီဒီယိုဥပဒေကိုပါ ပြင်ဆင်ရမည်ဖြစ်ပါကြောင်း၊ ဆင်ဆာအစား Rating စနစ်ဖြင့် ဆောင်ရွက်ပါကလည်း Rating စနစ် ပြုလုပ်သည့်နိုင်ငံတိုင်းတွင် ဇာတ်ညွှန်းအပြည့်အစုံ တင်ပြရမည်ဖြစ်ကြောင်း ဆွေးနွေးကြပါသည်။
ရုပ်ရှင်လောကသားတချို့က ဆင်ဆာအဖွဲ့ကို မလိုလား အမုန်းပွားကြတာများပါသည်။ တကယ်တော့ ဆင်ဆာအဖွဲ့ဝင်များသည် စေတနာ့ဝန်ထမ်းများသာ ဖြစ်၏။ မိမိတို့အား ပေးအပ်သည့် တာဝန်ကို ကျေပွန်စွာထမ်းဆောင်နေကြရာမှာ မည်သည့်ပုဂ္ဂိုလ်၊ မည်သူမည်ဝါမှန်းမသိဘဲ မိမိတို့ စစ်ဆေးရသည့် ဇာတ်လမ်းပေါ်မှာသာ အကောင်း၊ အဆိုး ဆုံးဖြတ် ကြရပါသည်။ မိမိတို့ရင်မှ ခံစားမှု၊ ဖန်တီးမှုများကို ဆင်ဆာအဖွဲ့မှ ရက်စက်စွာ ဖျက်လိုဖျက်ဆီးလုပ်သည်ဟု စွပ်စွဲ ပြောဆိုကြသည်။ တကယ်ရင်ထဲက ဖန်တီးတာလား၊ နိုင်ငံခြားဇာတ်လမ်းများ လုပ်ကြံထားတာလားဟု မေးချင်ပါသည်။ (ထိုစကားပြောထွက်သူကို ဆိုလိုပါသည်။ ယခင်က တစ်နှစ်လုံးမှ ဇာတ်ကား ၁ဝ ကားလောက်သာရှိပြီး ယခု ဆင်ဆာကြည့်ရန် တန်းစီထားသော ဇာတ်ကားသည် ၂ဝ၁၇ ခုနှစ်၊ ဖေဖော်ဝါရီလကုန်အထိ ဖြစ်နေသည်။ ဆင်ဆာအဖွဲ့ဝင်များ စနေ၊ တနင်္ဂနွေမှလွဲပြီး နေ့စဉ် ရုပ်ရှင်ကားကြီးများကို ကြည့်ရှုစစ်ဆေးပေးရပါသည်။ ဇာတ်ကားတွေများလာတော့ ဖြတ်တာတောက်တာများလာသည် ဟု ထင်ကြပေမည်။
ဗီဒီယိုလောက၊ ရုပ်ရှင်လောက ကျဆင်းတာဟာ ဆင်ဆာကြောင့်လို့ တော့ မစွပ်စွဲပါနှင့်။ မိမိတို့ကိုယ်တိုင်က ကားကောင်းကားသန့် မရိုက်ကူးနိုင်တာကို ပြန်ဆန်းစစ်စေလိုပါသည်။ ကမ္ဘာကိုထိုးဖောက်ဖို့၊ နိုင်ငံခြားဇာတ်ကားတွေလို အောင်မြင်ဖို့ဆိုတာ အောက်လုံးတွေလှိုင်လှိုင်သုံးပြီး အခြောက်ဇာတ်လမ်းတွေချည်း ရိုက် ကူးနေလို့ ဖြစ်လာမှာမဟုတ်ပါဘူး။ စာရေးသူက တရုတ်ပြည်မှ ရုပ်ရှင်ထုတ်လုပ်သူများနှင့် ဆင်ဆာအကြောင်း ဆွေးနွေးဖူးပါသည်။ သူတို့ဆီမှာ နိုင်ငံခြားဇာတ်ကား များကို ဘာသာပြန်ရာမှာ ညစ်ညမ်းသော စကားလုံးများကိုချန်လှပ်၍ ဘာသာပြန်ရပါသည်။ ညစ်ညမ်း သော အောက်ပိုင်းပြက်လုံးများကို လည်း ဆင်ဆာဖြတ်ပါသည်..တဲ့။ ခုတလောမှာ ဆင်ဆာမဖြတ် သော၊ အဖြတ်နည်းသော ဇာတ်ကားများ ရှိပါသည်။ “နှင်းဆီပန်သူ”၊ “မေတ္တာထားတာ အဟုတ်ကိုပဲ”၊ “ကြွေ” စသည်တို့ ဖြစ်ပါသည်။ သည်တစ်နှစ်လုံးမှာလည်း ဒါရိုက်တာဝိုင်း၏ ဇာတ်ကားများ ဆင်ဆာဖြတ်တာ မရှိသလောက် တွေ့ရ၏။
Bo Bo Filmာ ကထုတ်လုပ်သော “ကြွေ” ဆိုသော ဇာတ်ကားဆိုလျှင် ဆင်ဆာအဖွဲ့ဝင်တိုင်း ကြိုက်နှစ်သက်သော ဇာတ်ကားဖြစ်သည်။စာရေးဆရာ မင်းလူ၏ ဝတ္ထု “ပြောတိုင်းယုံတဲ့ပုတ်သင်ညို” ကို ရုပ်ရှင်ရိုက်ကူးဖို့ ဇာတ်လမ်းတင်စဉ်က SKB (စော်ခိုင်းဘက်) တဲ့။ဘယ်လိုမှ မခံစားနိုင်သော ဇာတ်ကားအမည်ပါ။ ချစ်ရသူမိန်းကလေးအား ချစ်ရုံသက်သက်ဖြင့် ခိုင်းတာလုပ်ပေးသော ကောင်လေး၏အကြောင်းကို “စော်ခိုင်းဘက်” ဆိုတော့ ဘယ်လိုမှ Romance ဇာတ်လမ်းအဖြစ် ခံစားလို့ မရနိုင်။ အမည်ပြောင်းခိုင်းတော့မှ “ကြွေ” တဲ့။ ထိုဇာတ်ကားကို သားညီ ဒါရိုက်တာအဖြစ် ရိုက်ကူးသည်။မင်းသားက လွှမ်းပိုင်။ မင်းသမီး က အိချောပို။ လွှမ်းပိုင်က အလွန်ချစ်တတ်သော ရိုးအသည့် တက္ကသိုလ်ကျောင်းသားလေးအဖြစ် သရုပ်ဆောင်သွားပုံမှာ သဘာဝကျလွန်းသည်။ တကယ့်ကို ရိုးရိုးလေး။ အိချောပိုကတော့ ပြောစရာမလို။ တက္ကသိုလ်ကို နောက်ခံထား၍ ရိုက်ကူးသော ဇာတ်ကားဖြစ်သည်။ အင်းလျားကန်လည်းပါသည်။ သစ်ပုတ်ပင်ကြီးလည်းပါသည်။ အဓိပတိလမ်းမကြီးလည်းပါသည်။ စာရေးသူတို့ငယ်စဉ်က တက္ကသိုလ်ကို လွမ်းမောကြည်နူးစွာ တမ်းတမိ ၏။ သီချင်းတွေလည်း လိုအပ်မှ ထည့်သည်။ Night Club တွေ၊ ရေကူးကန်တွေလည်းမပါ၊ အောက်ပိုင်းပြက်လုံးတွေလည်းမပါ၊ အခြောက်လည်း မပါ။ သင်တန်းမတက်ဘဲ ကျောင်းသူ၊ ကျောင်းသားတွေ တစ်ပြုံကြီး လန်းလန်း၊ လန်းလန်းနှင့် အော်ဟစ်ရန်ဖြစ်တာလည်း မပါ။ ဇာတ်ကောင်များများမပါဘဲ ဇာတ်လမ်းပေါ်မှာ သစ္စာရှိစွာ ရိုက်ကူးသွားပုံအတွက် ဒါရိုက်တာ သားညီအား ချီးကျူးချင်ပါသည်။ နာမည်လေးကလည်း “ကြွေ” တဲ့။ ချစ်စရာကောင်းသည် မဟုတ် လား။ အကြောင်းဆက်စပ်၍ ပြောချင်တာပါ။
အခုတလော မြန်မာရုပ်ရှင် ဇာတ်ကား အတော်များများသည် ဇာတ်ကားအမည်များကို မြန်မာလိုမပေးဘဲ အင်္ဂလိပ်လိုပေးနေကြပါသည်။ တစ်ကားတလေ အင်္ဂလိပ်လို ပေးရင်တော့ ဟုတ်တယ်။ အခုတော့ ရုပ်ရှင်၊ ဗီဒီယိုဇာတ်ကား တော်တော်များများဟာ မြန်မာလို အမည်မပေးတော့ဘူး။ Vampire, Bad Boy, Loser, Accident, Hospital စသည်ဖြင့်ပေါ့။ အဲဒီလိုဇာတ်ကားအမည်တင် မဟုတ်တော့ဘူး။ သရုပ်ဆောင်၊ ကင်မရာမင်းစတဲ့အမည်တွေကိုပါ ခေါင်းစီးစာတန်းထိုးတဲ့အခါလည်း မြန်မာစာ လုံးဝမပါတော့ဘူး။ အင်္ဂလိပ်လိုချည်းရေးတာလေ။ မြန်မာပြည်မှာပြတဲ့၊ မြန်မာလူမျိုးတွေ ရိုက်ကူးတဲ့၊ မြန်မာ မင်းသား၊ မင်းသမီးချည်း ပါဝင်တဲ့ မြန်မာ့ရုပ်ရှင်ဇာတ်ကား မဟုတ်လား။ နိုင်ငံခြားသွားပြမယ့် ဇာတ်ကားမှ မဟုတ်တာ။ နိုင်ငံခြားသွားပြမယ်ဆိုရင်လည်း လုပ်ပေါ့။ ဒါပေမဲ့ မြန်မာနဲ့ အင်္ဂလိပ်စာတန်း တွဲထိုးသင့်တယ်။ တရုတ်ဇာတ်ကား၊ ထိုင်း ဇာတ်ကား၊ ကုလားဇာတ်ကား စတဲ့ နိုင်ငံခြားဇာတ်ကားတွေကို ကြည့်ပါ။ တရုတ်စာပြီးမှ အင်္ဂလိပ် ၊ ကုလားစာပြီးမှ အင်္ဂလိပ် အဲဒီလိုစာတန်းထိုးတယ်။ သူတို့ ဘာသာ၊ သူတို့နိုင်ငံ၊ သူတို့စာကို ချစ်ကြောင်း ပြတာမဟုတ်လား။ရုပ်ရှင်အနုပညာရှင်တိုင်းမှာ ကိုယ့်လူမျိုး၊ ကိုယ့်ယဉ်ကျေးမှုကို ထိန်းသိမ်းဖို့ တာဝန်ရှိပါသည်။ ကမ္ဘာ ကို ထိုးဖောက်ဖို့ဆိုတာ ဒီလိုအင်္ဂလိပ်စာတန်းထိုးနေရုံနဲ့ ယှဉ်ပြိုင် ထိုးဖောက်နိုင်တာ မဟုတ်ပါ။ အလွန်ချစ်စရာကောင်းသော မြန်မာလူမျိုးများ၏ ယဉ်ကျေးမှု ဓလေ့စရိုက်တွေနှင့် မြန်မာနိုင်ငံ၏ ဂုဏ်ယူဖွယ်ရာ ရေမြေ အနေအထား သာယာမှု၊ အဖိုးတန်သယံဇာတတွေ ထွက်ရှိမှုအပေါ် ကမ္ဘာသိအောင် စိတ်ဝင်စားဖွယ် တင်ပြပြီး ထိုးဖောက်သင့်သည် မဟုတ်လား။ကိုရီးယားဇာတ်ကားများမှာ သူတို့၏အလေ့အကျင့် စရိုက်တွေ ကို စိတ်ဝင်စားဖွယ်ရာ ရိုက်ကူးပြ ကြပါသည်။ မိမိလူမျိုး၊ မိမိယဉ်ကျေးမှုကို အများသိအောင် ပြုစုစောင့် ရှောက်ပေးရမှာ အနုပညာသမားတို့ ၏ တာဝန်ဆိုတာ မြန်မာရုပ်ရှင် ဒါရိုက်တာနှင့် အနုပညာရှင်များ မေ့နေကြရော့လားဟု တွေးမိပါ သည်။
မိမိစာ၊ မိမိစကားကိုမှ မလေးစားလျှင် လူမျိုးပါ ပပျောက် သွားနိုင်တာကို သတိပြုဆင်ခြင်သင့် ပါသည်။ မိမိတို့ထက်ပို၍ တိုးတက် သော နိုင်ငံခြားအတတ်ပညာ၊ အသိ ပညာတွေ နားလည်တတ်ကျွမ်း အောင် လုပ်ပါ။ မိမိလူမျိုး၊ မိမိစာ တော့ တိမ်ကောပပျောက်သွားအောင် မလုပ်စေချင်ပါ။ မြန်မာ့ရုပ်ရှင်ထုတ်လုပ်သူ ဒါရိုက်တာတွေအနေနှင့် မိမိတို့ဇာတ် လမ်းနှင့် လိုက်ဖက်ဆီလျော်သော အမည်တွေ ပေးစရာမရှိတော့ဘူး လားဟု မေးချင်ပါသည်။ ဇမ္ဗူဒိပ်ကျွန်း နိမိတ်ထွန်းသည်မို့ ကျွန်မတို့ မြန်မာတွေအနေ နှင့် “အုတ်ကြားမြက်ပေါက်” တို့၊ “ခိုးဆိုးလုနှိုက်” တို့၊ “အမေလူမိုက် သားလူမိုက်” စသောအမည်များကို မပေးစေချင်ပါရှင်။ စာရေးသူ လက်တွေ့ပါ။ လုံးချင်းဝတ္ထုများ ရေးခဲ့စဉ်က ကောင်းသောအတိတ်နိမိတ်ဆောင်သည့် အမည်များသာ ဝတ္ထုအမည် ပေးခဲ့ပါသည်။ စောစောကပြောခဲ့သလို “စော်ခိုင်းဘက်” အစား “ကြွေ” ဟုအမည်ပြောင်းလိုက်တော့ ဝတ္ထု ဇာတ်လမ်းအား ပို၍သိမ်မွေ့နူးညံ့ ထိရှ သွားစေတာဖြစ်ပါသည်။ မြန်မာရုပ်ရှင်ဇာတ်ကားတွေ မှာ မြန်မာအမည်လှလှလေးတွေ ရှိပါသည်။ ဥပမာ- သမ္မတကြီးထံ ပေးစာ၊ ယောက်ျားဧကန်၊ ကျွန်မ အချစ်ဆုံး ယောက်ျားသုံးယောက်၊ အချစ်နှင့်ထိရင်ကြွေ၊ ရောင်နီဦး၏ ပန်းလေးတစ်ပွင့်၊ နေဝင်အိပ်တန်းတက်၊ ရင်ဘတ်ထဲကဓား၊ ခရေ စသည်ဖြင့်ပေါ့လေ။တကယ်တော့ စာရေးသူက ရုပ်ရှင်နှင့် စာပေအနုပညာကို သံယောဇဉ်ကြီးစွာဖြင့် အနုပညာသမားတွေကြောင့် တိုင်းပြည်နှင့် လူမျိုးဂုဏ် မညှိုးနွမ်းစေချင်သော စေတနာကြောင့် ဤဆောင်းပါး ရေးရခြင်းပါရှင်။
တက္ကသိုလ် ယဉ်ယဉ်လဲ့
