ရန်ကုန်၊ သြဂုတ် ၉
ရန်ကုန်မြို့၊ အလုံမြို့နယ်၊ မင်းရဲကျော်စွာလမ်းရှိ ရန်ကုန်တရုတ်ယဉ်ကျေးမှုစင်တာတွင် တရုတ်ရိုးရာအက ကိုယ်ဟန်အထူးသင်တန်းကို ဩဂုတ် ၁၈ ရက်မှ ဩဂုတ်လကုန်အထိ အခမဲ့ဖွင့်လှစ်သင်ကြားပေးသွားမည်ဖြစ်ကြောင်း သိရသည်။
အဆိုပါသင်တန်းကို ရန်ကုန်တရုတ်ယဉ်ကျေးမှုစင်တာနှင့် Yuanyi International Dance Academy (YIDA- Beijing Dance Academy မြန်မာနိုင်ငံ ပြည်ပစစ်ဆေးမှုဌာန) တို့ ပူးပေါင်းဖွင့်လှစ်ခြင်းဖြစ်ပြီး တရုတ်ရိုးရာအကပညာရှင် ဆရာမများက အကကိုယ်ဟန်နှင့် လှုပ်ရှားမှုများကို စနစ်တကျ သင်ကြားပို့ချပေးသွားမည်ဖြစ်သည်။
သင်တန်းတွင် အသက် ၁၆ နှစ်မှ ၃၅ နှစ်အတွင်း တရုတ်ရိုးရာအကကို စိတ်ဝင်စားသူများ ပါဝင်တက်ရောက်နိုင်ပြီး သင်တန်းကြေးအခမဲ့ဖြစ်ကြောင်း သိရသည်။
အဆိုပါသင်တန်းအတွက် စိတ်ဝင်စားသူများထံမှ လျှောက်လွှာများကိုလည်း ရန်ကုန်တရုတ်ယဉ်ကျေးမှုစင်တာက လက်ခံခေါ်ယူခဲ့ပြီးဖြစ်ကြောင်း သိရသည်။
