ဩဂုတ်လ ၁ ရက်
Google Earth အသုံးပြုသူများအနေဖြင့် ဂြိုဟ်တုဓာတ်ပုံများပေါ်တွင် AI နည်းပညာဖြင့် ပုံရိပ်များကို စိတ်ကြိုက် ဖန်တီးပုံဖော်နိုင်သည့် လုပ်ဆောင်ချက်သစ်တစ်ရပ်ကို သတင်းအမှားများ ပျံ့နှံ့လာနိုင်ခြေ သုတေသီများနှင့် အိုးပင်းဆို့ဇ် သတင်းအချက်အလက် (OSINT) ကျွမ်းကျင်သူများ၏ ပြင်းထန်သော စိစစ်ဝေဖန်မှုများ အပြီးတွင် ဂူဂယ်လ်က သောကြာနေ့၌ ပြန်လည်ရုပ်သိမ်းလိုက်သည်။
“ဂျီအိုစပေရှယ် နည်းပညာရှင်တွေက ဒီလုပ်ဆောင်ချက်ကို အသုံးဝင်တဲ့ အကြောင်းအရာများစွာမှာ အသုံးပြုနေတာကို ကျွန်ုပ်တို့ တွေ့ရှိရပေမဲ့ ကျွန်ုပ်တို့ရဲ့ မူဝါဒတွေကို ချိုးဖောက်နေပုံရတဲ့ ဖန်တီးထားတဲ့ ပုံရိပ်တွေကို မျှဝေနေကြတာကိုလည်း တွေ့မြင်ခဲ့ရပါတယ်” ဟု ဂူဂယ်လ် ပြောရေးဆိုခွင့်ရှိသူတစ်ဦးက သတင်း ထုတ်ပြန်ချက်တွင် ပြောကြားခဲ့သည်။
“ဒါကြောင့် ပိုမိုခိုင်မာတဲ့ စိစစ်ထိန်းချုပ်မှုတွေကို အကောင်အထည်ဖော်ဖို့ ဆောင်ရွက်နေစဉ်အတွင်း Google Earth မှာပါဝင်တဲ့ ဒီလုပ်ဆောင်ချက်ကို ပြန်လည်ရုပ်သိမ်းထားတာ ဖြစ်ပါတယ်။ လူအများဟာ ကမ္ဘာကြီးရဲ့ မြင်ကွင်းတစ်ခုအတွက် Google Earth ကို အထူးယုံကြည်ကြတယ်ဆိုတာကို ကျွန်ုပ်တို့ သိရှိပါတယ်” ဟု အဆိုပါ သတင်းထုတ်ပြန်ချက်တွင် ဖြည့်စွက်ဖော်ပြထားသည်။
ကြာသပတေးနေ့က စတင်မိတ်ဆက်ခဲ့သည့် “Create image” အမည်ရှိ နည်းပညာသည် ဂူဂယ်လ်၏ Nano Banana 2 ပုံရိပ်ဖန်တီးမှု နည်းပညာကို Google Earth အတွင်း ထည့်သွင်းထားခြင်းဖြစ်ပြီး အသုံးပြုသူများအနေဖြင့် နေရာတစ်ခုခုသို့ ချဲ့ကြည့်ကာ စနစ်တွင်ရှိသော ဂြိုဟ်တု၊ ဝေဟင်နှင့် 3D မြေပုံ ဒေတာများကို အခြေခံ၍ စက္ကန့်ပိုင်းအတွင်း ပုံရိပ်များ ဖန်တီးနိုင်မည် ဖြစ်သည်။
ဂူဂယ်လ်က ယင်းလုပ်ဆောင်ချက်ကို “သမိုင်းဝင် ဖြစ်ရပ်များကို ပုံဖော်ခြင်း၊ အိမ်ခြံမြေ စီမံကိန်းများ ဆွဲသားခြင်းနှင့် အခြား ကိစ္စရပ်များ လုပ်ဆောင်နိုင်ရန်” လျာထားခြင်းဖြစ်ကြောင်း ဖော်ပြခဲ့သည်။
Ref: ဆော့သ်ချိုင်းနားမောနင်းပို့စ်
