နိုင်ငံ့ဂုဏ်ဆောင် ဘိလိယက်နှင့် စနူကာအားကစားသမားများကိုဂုဏ်ပြုချီးမြှင့်

   
(၃၃) ကြိမ်မြောက် အရှေ့တောင်အာရှအားကစားပြိုင်ပွဲနှင့် တရုတ်နိုင်ငံ၌ကျင်းပခဲ့သည့် 2026 Heyball Masters Tour ပြိုင်ပွဲတို့တွင်ဆုရရှိခဲ့ကြသော နိုင်ငံ့ဂုဏ်ဆောင် ဘိလိယက်နှင့် စနူကာအားကစားသမားများကို ယနေ့ သြဂုတ် ၁ ရက်နံနက်ပိုင်းကဂုဏ်ပြုချီးမြှင့်ခဲ့ကြောင်း သိရသည်။
   
၂ဝ၂၅ ခုနှစ်၊ ဒီဇင်ဘာလက ထိုင်းနိုင်ငံ၌ကျင်းပခဲ့သည့် (၃၃) ကြိမ်မြောက်အရှေ့တောင်အာရှအားကစားပြိုင်ပွဲတွင်ရွှေတံဆိပ် (၁) ခု၊ ငွေတံဆိပ် (၁) ခုနှင့်ကြေးတံဆိပ် (၃) ခုရရှိခဲ့သော ဘိလိယက်နှင့် စနူကာအားကစားသမားများ၊ အုပ်ချုပ်၊နည်းပြအဖွဲ့ဝင်များနှင့်၂ဝ၂၆ ခုနှစ်၊ ဇူလိုင်လအတွင်းက တရုတ်နိုင်ငံ၌ကျင်းပခဲ့သည့် 2026 Heyball Masters Tour ပြိုင်ပွဲတွင် 1st Runner -up (ဒုတိယဆု) ရရှိခဲ့သည့်မောင်ဘုန်းမြင့်ကျော် (ခ) အားတီတို့အားဂုဏ်ပြုဆုငွေများချီးမြှင့်ခဲ့ကြောင်း သိရသည်။
   
ရန်ကုန်တိုင်း၀န်ကြီးချုပ်ဦးအောင်နိုင်သူက (၃၃) ကြိမ်မြောက်အရှေ့တောင်အာရှအားကစားပြိုင်ပွဲတွင် ဘိလိယက်အသင်းလိုက် ရွှေတံဆိပ်ဆုရ ဦးပေါက်စ၊ ကိုအောင်ဌေးနှင့် ကိုနေသွေးဦးတို့အား ဂုဏ်ပြုချီးမြှင့်ငွေ ကျပ်သိန်း (၃၀၀)၊ တရုတ်နိုင်ငံ၌ကျင်းပခဲ့သည့် 2026 Heyball Masters Tour ပြိုင်ပွဲတွင် 1st Runner-up ဆုရ မောင်ဘုန်းမြင့်ကျော်အား ဂုဏ်ပြုချီးမြှင့်‌ငွေကျပ်သိန်း (၁၀၀) ချီးမြင့်ခဲ့ကြောင်း သိရသည်။
   
ထို့ပြင် တိုင်းဒေသကြီးလွှတ်တော်ဒုတိယဥက္ကဌ ဦး‌‌ကျော်ကျော်စိုး၊ မြန်မာနိုင်ငံဘိလိယက်နှင့်စနူကာအဖွဲ့ချုပ်ဥက္ကဋ္ဌ ဦးအောင်ခန့်ကျော်တို့ကလည်း ဂုဏ်ပြုချီးမြှင့်ငွေများပေးအပ်ချီးမြှင့်ခဲ့ကြကြောင်း သိရသည်။