လိင်ပိုင်းဆိုင်ရာ အလွဲသုံးစားလုပ်မှုနဲ့ စွပ်စွဲခံထားရတဲ့ နိုင်ငံတကာရာဇဝတ်ခုံရုံး (ICC) ရဲ့ရှေ့နေချုပ် ကာရင်မ် ခန်း(Karim Khan) ဟာ သူ့ကို ယာယီတာဝန်ဆိုင်းငံ့ထားတာကို ပြန်ရုပ်သိမ်းပေးဖို့ အယူခံဝင်ခဲ့ပေမယ့် ရှုံးနိမ့်သွားတယ်လို့ ဗြိတိန်ရှေ့နေတွေကို ကြီးကြပ်ကွပ်ကဲတဲ့ Bar Standards Board(BSB) က အင်္ဂါနေ့မှာ ပြောကြားလိုက်ပါတယ်။
အသက် ၅၆ နှစ်အရွယ် ရှေ့နေ မစ္စတာခန်းကတော့ သူ့အပေါ် စွပ်စွဲချက်တွေကို ငြင်းဆိုထားပါတယ်။
သူ့ကို ဇွန်လ ၈ ရက်နေ့ကတည်းက ICC ရဲ့ အုပ်ချုပ်ရေးအဖွဲ့ကနေ ရာထူးကနေ ဆိုင်းငံ့ထားခဲ့ပြီးဖြစ်ပါတယ်။ ICC ဟာ အမေရိကန်နဲ့ အစ္စရေးကို စုံစမ်းစစ်ဆေးမှုတွေ လုပ်ခဲ့လို့ အမေရိကန်ရဲ့ ဒဏ်ခတ်ပိတ်ဆို့မှုတွေကို ခံနေရတဲ့အပြင် အခုကိစ္စကြောင့်လည်း စစ်ရာဇဝတ်မှုခုံရုံးရဲ့ အကျပ်အတည်းတွေ ပိုပြီး ကြာရှည်သွားစေပါတယ်။
သူ့အပေါ် စွပ်စွဲချက်တွေနဲ့ ပတ်သက်ပြီး BSB ဘုတ်အဖွဲ့ ဒါမှမဟုတ် စည်းကမ်းထိန်းသိမ်းရေး ခုံရုံးကနေ အဆုံးအဖြတ် တစ်စုံတစ်ရာ မပေးမချင်း သူ့ကို ရှေ့နေအဖြစ် အသက်မွေးဝမ်းကျောင်းပြုခွင့် ဆိုင်းငံ့ထားမယ်လို့ Bar Standards Board က ဆိုပါတယ်။
သူ့ကို ထောက်ခံသူတွေကတော့ ဂါဇာစစ်ပွဲအတွင်း အစ္စရေးရဲ့ လုပ်ရပ်တွေနဲ့ ပတ်သက်ပြီး အစ္စရေးအရာရှိတွေကို ဖမ်းဝရမ်းထုတ်ဖို့ သူကကြိုးပမ်းခဲ့တဲ့အတွက် အခုလို နိုင်ငံရေးအရ ပစ်မှတ်ထားခံရတာလို့ မှတ်ချက်ပြုပြောဆိုနေကြပါတယ်။
ICC ကို ၂၀၀၂ ခုနှစ်မှာ စတင်ဖွဲ့စည်းခဲ့တာပါ။
ဒါပေမယ့် နိုင်ငံတကာရာဇဝတ်တရားရုံး (International Criminal Court – ICC) ကို “ဖျက်သိမ်းပစ်မယ်” လို့ အမေရိကန် နိုင်ငံခြားရေးဝန်ကြီး မာကို ရူဘီယိုက တနင်္လာနေ့မှာ ကတိပြုပြောကြားလိုက်ပြန်ပါတယ်။ အမေရိကန်အစိုးရအနေနဲ့ အဲဒီအဖွဲ့အစည်းကို ဆန့်ကျင်တဲ့လှုပ်ရှားမှုတွေ အရှိန်မြှင့်လုပ်ဆောင်နေချိန်မှာ တခြားနိုင်ငံတွေအနေနဲ့လည်း ဒီလုပ်ရပ်မှာ ပူးပေါင်းပါဝင်ဖို့ သူက တိုက်တွန်းခဲ့ပါတယ်။