လူငယ်များ၏ အလုပ်အကိုင်အခွင့်အလမ်းများ တိုးမြှင့်ဖန်တီးပေးနိုင်ရေးနှင့် လုပ်ငန်းရှင်များ၊ အလုပ်အကိုင်ရှာဖွေသူများအကြား ထိရောက်သော ချိတ်ဆက်မှုများ ဖော်ဆောင်နိုင်ရေးကို ရည်ရွယ်၍ ရန်ကုန်တိုင်းဒေသကြီး လူငယ်စွန့်ဦးတီထွင်လုပ်ငန်းရှင်များအသင်း (Yangon Region Young Entrepreneurs Association – YRYEA) က ကြီးမှူးစီစဉ်သည့် NextGen Career and Opportunity Fair 2026 ကို ဇူလိုင် ၄ ရက်က ရန်ကုန်မြို့ရှိ Sedona Hotel (Grand Ballroom) ၌ စတင်ကျင်းပခဲ့သည်။
အဆိုပါ Career Fair ကို ဇူလိုင် ၄ ရက်နှင့် ၅ ရက်တို့တွင် နံနက် ၉ နာရီမှ ညနေ ၆ နာရီအထိ နှစ်ရက်တိုင်တိုင် ကျင်းပသွားမည်ဖြစ်ပြီး၊ ဖွင့်ပွဲအခမ်းအနားတွင် ဖိတ်ကြားထားသည့် ဧည့်သည်တော်များက အဖွင့်အမှာစကားများ ပြောကြားခဲ့ကြသည်။
ထို့ပြင် YRYEA ဥက္ကဋ္ဌနှင့် တာဝန်ရှိသူများ၊ စီးပွားရေးလုပ်ငန်းရှင်များ၊ ကုမ္ပဏီကိုယ်စားလှယ်များ၊ လူငယ်လုပ်ငန်းရှင်များ၊ တက္ကသိုလ်ကျောင်းသား၊ ကျောင်းသူများ၊ အလုပ်အကိုင်ရှာဖွေသူများနှင့် သတင်းမီဒီယာများ တက်ရောက်ခဲ့ကြပြီး ဖဲကြိုးဖြတ်ဖွင့်လှစ်ခြင်း အစီအစဉ်ကိုလည်း ပြုလုပ်ခဲ့သည်။
Career Fair တွင် ကုမ္ပဏီနှင့် အဖွဲ့အစည်းပေါင်း ၇၀ ကျော် ပါဝင်ပြသထားပြီး အလုပ်အကိုင်ရှာဖွေသူများအနေဖြင့် CV များကို ကုမ္ပဏီများထံ တစ်နေရာတည်းမှ တိုက်ရိုက်လျှောက်ထားနိုင်ခြင်း၊ ကျွမ်းကျင်သူများထံမှ CV Review ဝန်ဆောင်မှု ရယူနိုင်ခြင်း၊ အလုပ်အင်တာဗျူးများကို တိုက်ရိုက်ဖြေဆိုနိုင်ခြင်းနှင့် အလုပ်သမားမှတ်ပုံတင်ကတ် (Labour Card) ကို တစ်နေရာတည်းတွင် လျှောက်ထားဆောင်ရွက်နိုင်ခြင်းတို့ကို ရရှိနိုင်မည်ဖြစ်သည်။
ထို့အပြင် Talk Show၊ Panel Discussion နှင့် Influencer Sharing Session များကို နှစ်ရက်တာအတွင်း ကျင်းပသွားမည်ဖြစ်ပြီး ဆောက်လုပ်ရေး၊ အိမ်ခြံမြေ၊ အိမ်တွင်းအလှဆင်၊ အီလက်ထရောနစ်၊ နည်းပညာ၊ မိုဘိုင်းဖုန်း၊ ဘဏ်လုပ်ငန်း၊ အလှကုန်၊ ပညာရေး၊ စားသောက်ကုန်နှင့် အသေးစား၊ အလတ်စားစီးပွားရေးလုပ်ငန်းများ အပါအဝင် ကဏ္ဍစုံမှ လုပ်ငန်းများကို လေ့လာနိုင်မည်ဖြစ်ကြောင်း သိရသည်။
ထို့ပြင် နောက်ဆုံးပေါ် ခေတ်မီနည်းပညာများနှင့် ဆန်းသစ်တီထွင်မှုများကိုလည်း ပြသသွားမည်ဖြစ်ပြီး အလုပ်အကိုင်ရှာဖွေသူများ၊ တက္ကသိုလ်ကျောင်းသား၊ ကျောင်းသူများ၊ ဘွဲ့ရလူငယ်များ၊ လုပ်ငန်းရှင်များနှင့် စိတ်ပါဝင်စားသူ မည်သူမဆို အခမဲ့ လာရောက်လေ့လာနိုင်ကြောင်း YRYEA က အသိပေးထားသည်။