ရုရှားတောင်ပံကစားသမား ဒန်နီရယ်မူဆက်ကင်ကို ရန်ကုန်ယူနိုက်တက် တစ်ရာသီစာချုပ်ဖြင့် ခေါ်ယူ
AFC Challenge League 2026-27 နှင့် ပြန်လည်စတင်မည့် မြန်မာနေရှင်နယ်လိဂ်ပြိုင်ပွဲများအတွက် အသင်းအားဖြည့်ပြင်ဆင်မှုအဖြစ် ရန်ကုန်ယူနိုက်တက်အသင်းသည် သီရိလင်္ကာကလပ် Pelicans FC မှ ရုရှားနိုင်ငံသား ညာတောင်ပံကစားသမား ဒန်နီရယ်မူဆက်ကင်ကို တစ်ရာသီစာချုပ်ဖြင့် ခေါ်ယူလိုက်ကြောင်း သိရသည်။
ဒန်နီရယ်မူဆက်ကင်သည် AFC Challenge League ပြိုင်ပွဲတွင် မွန်ဂိုလီးယားကလပ် SP Falcon အသင်းနှင့် နှစ်ရာသီဆက်တိုက် ပါဝင်ယှဉ်ပြိုင်ခဲ့ဖူးပြီး အုပ်စုအဆင့်ပြိုင်ပွဲတွင် သွင်းဂိုးတစ်ဂိုး သွင်းယူနိုင်ခဲ့သည့် အတွေ့အကြုံရှိ ကစားသမားတစ်ဦးဖြစ်သည်။
ထို့ပြင် SP Falcon အသင်းနှင့်အတူ တစ်ရာသီအတွင်း ချန်ပီယံဆုဖလား (၃) လုံး ဆွတ်ခူးနိုင်ခဲ့သလို ထိုင်းကလပ် ချင်းမိုင်အသင်းတွင်လည်း ကစားခဲ့ဖူးပြီးနောက် သီရိလင်္ကာကလပ် Pelicans FC သို့ ပြောင်းရွှေ့ကစားကာ ချန်ပီယံဆုဖလား ဆွတ်ခူးနိုင်ခဲ့သူလည်း ဖြစ်သည်။
အရပ် ၅ ပေ ၁၁ လက်မရှိသော ဒန်နီရယ်မူဆက်ကင်က “ရန်ကုန်ယူနိုက်တက်အသင်းကို ရောက်ရှိလာရတဲ့အတွက် အလွန်ဝမ်းသာပါတယ်။ အသင်းနဲ့အတူ လေ့ကျင့်ရေးအစီအစဉ်တွေကို အမြန်ဆုံးစတင်ချင်နေပြီး မြန်မာနေရှင်နယ်လိဂ်နဲ့ AFC Challenge League ပြိုင်ပွဲတွေမှာ အကောင်းဆုံးစွမ်းဆောင်နိုင်ဖို့ သေချာပြင်ဆင်ထားပါတယ်” ဟု ပြောကြားခဲ့ကြောင်း သိရသည်။
