အိန္ဒိယဝန်ကြီးချုပ် မိုဒီ အင်ဒိုနီးရှား၊ သြစတြေးလျနှင့် နူးဇီလန်သို့ သွားရောက်မည်

ဒေသတွင်း မဟာဗျူဟာမြောက် ပူးပေါင်းဆောင်ရွက်မှု မြှင့်တင်ရေး ဆွေးနွေးမည်

အိန္ဒိယဝန်ကြီးချုပ် နာရင်ဒြာမိုဒီသည် ဇူလိုင် ၈ ရက်မှ ၁၁ ရက်အထိ အင်ဒိုနီးရှား၊ သြစတြေးလျနှင့် နူးဇီလန်နိုင်ငံများသို့ သွားရောက်မည်ဖြစ်ပြီး ဒေသတွင်း မဟာဗျူဟာမြောက် ပူးပေါင်းဆောင်ရွက်မှုများ တိုးမြှင့်ရေးနှင့် နှစ်နိုင်ငံဆက်ဆံရေး ခိုင်မာစေရေးအတွက် သက်ဆိုင်ရာနိုင်ငံခေါင်းဆောင်များနှင့် တွေ့ဆုံဆွေးနွေးသွားမည်ဖြစ်ကြောင်း အိန္ဒိယနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

အိန္ဒိယနိုင်ငံခြားရေးဝန်ကြီးဌာန၏ အကြီးတန်းတာဝန်ရှိသူ ရူရန်ဒရာ တန်ဒွန်က ယခုခရီးစဉ်သည် အိန္ဒိယ၏ “Act East Policy” အရ အရှေ့ပိုင်းရေကြောင်းဒေသများနှင့် ထိတွေ့ဆက်ဆံမှုကို ပိုမိုအလေးထားဆောင်ရွက်နေခြင်းကို ထင်ဟပ်စေကြောင်း ဇူလိုင် ၃ ရက်က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

မိုဒီသည် ဇူလိုင် ၈ ရက်နှင့် ၉ ရက်တို့တွင် အင်ဒိုနီးရှားနိုင်ငံသို့ သွားရောက်မည်ဖြစ်ပြီး ဂျကာတာ၌ နှစ်နိုင်ငံဆွေးနွေးပွဲများ ပြုလုပ်ကာ ယူနက်စကို ကမ္ဘာ့အမွေအနှစ်စာရင်းဝင် ပရမ်ဘာနန်ဘုရားကျောင်းသို့လည်း သွားရောက်မည်ဖြစ်သည်။ ခရီးစဉ်အတွင်း ရေကြောင်းလုံခြုံရေး၊ ကာကွယ်ရေး၊ ကုန်သွယ်ရေးနှင့် ယဉ်ကျေးမှုကဏ္ဍများတွင် ပူးပေါင်းဆောင်ရွက်မှုများကို ပြန်လည်သုံးသပ်သွားမည်ဖြစ်ကြောင်း သိရသည်။

ထို့နောက် ဇူလိုင် ၁၀ ရက်တွင် သြစတြေးလျနိုင်ငံ မဲလ်ဘန်းမြို့၌ ကျင်းပမည့် တတိယအကြိမ် အိန္ဒိယ-သြစတြေးလျ နှစ်ပတ်လည် ထိပ်သီးအစည်းအဝေးသို့ တက်ရောက်မည်ဖြစ်ပြီး ၂၀၂၀ ခုနှစ်တွင် စတင်ခဲ့သည့် နှစ်နိုင်ငံ ဘက်စုံမဟာဗျူဟာမြောက် မိတ်ဖက်ဆက်ဆံရေးအောက်မှ ပူးပေါင်းဆောင်ရွက်မှုများကို ဆွေးနွေးသွားမည်ဖြစ်သည်။

ခရီးစဉ်နောက်ဆုံးအဖြစ် ဇူလိုင် ၁၁ ရက်တွင် နူးဇီလန်နိုင်ငံသို့ သွားရောက်ကာ ဝန်ကြီးချုပ် ခရစ္စတိုဖာ လူဆွန်နှင့် တွေ့ဆုံဆွေးနွေးမည်ဖြစ်သည်။ ယခုနှစ် ဧပြီလတွင် လက်မှတ်ရေးထိုးခဲ့သည့် အိန္ဒိယ-နူးဇီလန် လွတ်လပ်သောကုန်သွယ်ရေးသဘောတူညီချက် (FTA) အကောင်အထည်ဖော်ရေးနှင့် စီးပွားရေးပူးပေါင်းဆောင်ရွက်မှု တိုးမြှင့်ရေးကိစ္စရပ်များလည်း ဆွေးနွေးဖွယ်ရှိကြောင်း သိရသည်။

Ref: CNA