၂၀၂၆ ဖီဖာကမ္ဘာ့ဖလား အုပ်စု (I) နောက်ဆုံးပွဲစဉ်တွင် အူစမန် ဒမ်ဘီလီ၏ ဟက်ထရစ်သွင်းဂိုး (၃)ဂိုးဖြင့် ပြင်သစ်အသင်းက နော်ဝေအသင်းကို (၄-၁) ဂိုးဖြင့် အနိုင်ရရှိကာ အုပ်စုဗိုလ်အဖြစ် (၃၂)သင်း ရှုံးထွက်အဆင့်သို့ တက်ရောက်နိုင်ခဲ့သည်။
အမေရိကန်နိုင်ငံ၊ မက်ဆာချူးဆက်ပြည်နယ်၊ ဘော့စတွန်မြို့ရှိ ဘော့စတွန်အားကစားကွင်းတွင် ဇွန် ၂၆ ရက်က ယှဉ်ပြိုင်ခဲ့သည့် အဆိုပါပွဲတွင် ဒမ်ဘီလီက ပွဲချိန် ၇ မိနစ်၊ မိနစ် ၂၀ နှင့် ၃၂ မိနစ်တို့တွင် သွင်းဂိုးများသွင်းယူကာ ပထမပိုင်းအတွင်း ဟက်ထရစ်ရယူနိုင်ခဲ့သည်။ ပြင်သစ်အသင်း၏ စတုတ္ထဂိုးကို နာကျင်အချိန်ပိုတွင် ဒက်ဇီရေး ဒူအေးက သွင်းယူခဲ့ပြီး နော်ဝေအသင်း၏ တစ်လုံးတည်းသောချေပဂိုးကို သဲလို အက်စ်ဂါ့ဒ်က သွင်းယူခဲ့ကြောင်း သိရသည်။
ယခုနှစ် ဘလွန်းဒီအောဆုရှင် ဒမ်ဘီလီ၏ ဟက်ထရစ်မှာ ကမ္ဘာ့ဖလားသမိုင်းတစ်လျှောက် ဒုတိယအမြန်ဆုံး ဟက်ထရစ်အဖြစ် မှတ်တမ်းဝင်ခဲ့ပြီး ပြင်သစ်အသင်းသမိုင်းတွင် ကမ္ဘာ့ဖလားပြိုင်ပွဲ၌ ဟက်ထရစ်သွင်းယူနိုင်သည့် တတိယမြောက်ကစားသမားအဖြစ်လည်း မှတ်တမ်းဝင်ခဲ့သည်။
နော်ဝေအသင်းမှာ ယခုပွဲတွင် ရှုံးနိမ့်ခဲ့သော်လည်း အုပ်စုဒုတိယနေရာဖြင့် (၃၂)သင်း ရှုံးထွက်အဆင့်သို့ တက်ရောက်နိုင်ခဲ့ကြောင်း သိရသည်။
ဓာတ်ပုံ – Reuters