ယူရီးယားတစ်အိတ် ကျပ် ၁၂၀,၀၀၀ သတ်မှတ်
တောင်သူများ အဓိကအသုံးပြုနေသည့် ယူရီးယားနှင့် DAP မြေဩဇာများအတွက် ရန်ကုန်အထိုင် ရည်ညွှန်းလက္ကားဈေးနှုန်းများကို ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီ၏ ကြီးကြပ်မှုဖြင့် မြန်မာနိုင်ငံ မြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်း (MFSPEA) က ထုတ်ပြန်ကြေညာခဲ့သည်။
ထုတ်ပြန်ချက်အရ ၂၀၂၆ ခုနှစ် ဇွန် ၂၁ ရက်မှ ၃၀ ရက်အထိ ယူရီးယားမြေဩဇာ (အလုံးကြီး) ၅၀ ကီလိုဂရမ်တစ်အိတ်ကို ကျပ် ၁၂၀,၀၀၀ ဖြင့်လည်းကောင်း၊ Di-Ammonium Phosphate (DAP) အခြေခံ ၁၅-၁၅-၁၅ မြေဩဇာ ၅၀ ကီလိုဂရမ်တစ်အိတ်ကို ကျပ် ၁၁၅,၀၀၀ ဖြင့်လည်းကောင်း ရန်ကုန်အထိုင် လက္ကားရည်ညွှန်းဈေးနှုန်းအဖြစ် ရောင်းချရန် အသင်းဝင်ကုမ္ပဏီများအား ညွှန်ကြားထားကြောင်း သိရသည်။
ထို့ပြင် Complex ၁၅-၁၅-၁၅ မြေဩဇာအတွက် ရည်ညွှန်းဈေးနှုန်း သတ်မှတ်ထားခြင်းမရှိကြောင်း၊ အဆိုပါဈေးနှုန်းများမှာ ရန်ကုန်အထိုင် လက်ငင်းငွေချေစနစ်ဖြင့် ရောင်းချသည့် လက္ကားရည်ညွှန်းဈေးနှုန်းများဖြစ်ပြီး ဒေသအလိုက် သယ်ယူပို့ဆောင်စရိတ်ပေါ်မူတည်၍ ဈေးနှုန်းကွာခြားနိုင်ကြောင်း အသင်းက အသိပေးထားသည်။
ရည်ညွှန်းဈေးနှုန်းများနှင့်အညီ ရောင်းချခြင်းမရှိပါက ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီ ဖုန်း ၀၆၇-၄၁၀၀၃၅ သို့မဟုတ် မြန်မာနိုင်ငံ မြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်း (MFSPEA) ၏ ဖုန်း ၀၉-၉၈၈၅၃၉၃၆၀ နှင့် ၀၉-၆၆၅၄၀၇၈၉၀ တို့သို့ ဆက်သွယ်၍ အသိပေးတိုင်ကြားနိုင်ကြောင်း ထုတ်ပြန်ချက်တွင် ဖော်ပြထားသည်။