ဧရာဝတီတိုင်းဒေသကြီးအတွင်း ပြန်ကြားရေးနှင့် ပြည်သူ့ဆက်ဆံရေးဦးစီးဌာနက ရက် (၁၀၀) လှုပ်ရှားမှုအဖြစ် လူငယ်စကားဝိုင်း (၃၃) ကြိမ်၊ လူငယ်ရေးရာ အသိပညာပေးဟောပြောပွဲ (၅၁) ကြိမ်နှင့် ပြည်သူ့စကားဝိုင်း (၂၁) ကြိမ် စုစုပေါင်း (၁၀၅) ကြိမ် ကျင်းပနိုင်ခဲ့ကြောင်း ဧရာဝတီတိုင်းဒေသကြီး ပြန်ကြားရေးနှင့် ပြည်သူ့ဆက်ဆံရေးဦးစီးဌာန ညွှန်ကြားရေးမှူး ဒေါ်ဖြူဖြူရည်က ပြောကြားသည်။
“ပြည်သူ့အစိုးရ ပေါ်ပေါက်လာတာနဲ့အညီ ပြည်သူတွေ သိလိုတဲ့အချက်အလက်တွေကို ပွင့်လင်းစွာ မေးမြန်းနိုင်ဖို့အတွက် သက်ဆိုင်ရာဌာနဆိုင်ရာများ၊ လွှတ်တော်ကိုယ်စားလှယ်များ၊ ပညာရှင်များနဲ့ ဘာသာရပ်ဆိုင်ရာ ကျွမ်းကျင်သူတွေ ပါဝင်တဲ့ ပြည်သူ့စကားဝိုင်းတွေကို ဆောင်ရွက်ပေးနေတာ ဖြစ်ပါတယ်။ ဒါ့အပြင် လူငယ်တွေ စာဖတ်အားမြင့်မားလာစေဖို့ သုတ၊ ရသဆိုင်ရာ ဟောပြောပွဲတွေကိုလည်း ထည့်သွင်းကျင်းပခဲ့ပါတယ်” ဟု ဒေါ်ဖြူဖြူရည်က ပြောသည်။
ရက် (၁၀၀) အတွင်း လူငယ်စကားဝိုင်း (၆၂) ကြိမ် ကျင်းပရန် လျာထားခဲ့ရာ ပုသိမ်ခရိုင်၌ (၁၅) ကြိမ်၊ ဟင်္သာတခရိုင်၌ (၁) ကြိမ်၊ မြောင်းမြခရိုင်၌ (၅) ကြိမ်၊ မအူပင်ခရိုင်၌ (၂) ကြိမ်၊ ဖျာပုံခရိုင်၌ (၉) ကြိမ်နှင့် လပွတ္တာခရိုင်၌ (၁) ကြိမ် စုစုပေါင်း (၃၃) ကြိမ် ကျင်းပနိုင်ခဲ့ကြောင်း သိရသည်။
ထို့ပြင် “လူငယ်နှင့် အနာဂတ်နိုင်ငံတော်” ခေါင်းစဉ်ဖြင့် လူငယ်ရေးရာ အသိပညာပေးဟောပြောပွဲ (၇၀) ကြိမ် ကျင်းပရန် လျာထားခဲ့ရာ ပုသိမ်ခရိုင်၌ (၆) ကြိမ်၊ မြောင်းမြခရိုင်၌ (၁) ကြိမ် စုစုပေါင်း (၇) ကြိမ် ဆောင်ရွက်နိုင်ခဲ့သည်။
အလားတူ လူငယ်ရေးရာ ဟောပြောပွဲများကို ပုသိမ်ခရိုင်၌ (၂၂) ကြိမ်၊ ဟင်္သာတခရိုင်၌ (၁) ကြိမ်၊ မြောင်းမြခရိုင်၌ (၁၀) ကြိမ်၊ မအူပင်ခရိုင်၌ (၆) ကြိမ်၊ ဖျာပုံခရိုင်၌ (၁၁) ကြိမ်နှင့် လပွတ္တာခရိုင်၌ (၁) ကြိမ် စုစုပေါင်း (၅၁) ကြိမ် ကျင်းပနိုင်ခဲ့ကြောင်း ၎င်းက ဆက်လက်ပြောကြားသည်။
ထို့အပြင် ပြည်သူ့စကားဝိုင်း (Public Talk) များ (၃၆) ကြိမ် ကျင်းပရန် လျာထားခဲ့ရာ ပုသိမ်ခရိုင်၌ (၈) ကြိမ်၊ ဟင်္သာတခရိုင်၌ (၂) ကြိမ်၊ မြောင်းမြခရိုင်၌ (၁) ကြိမ်၊ မအူပင်ခရိုင်၌ (၂) ကြိမ်၊ ဖျာပုံခရိုင်၌ (၆) ကြိမ်နှင့် လပွတ္တာခရိုင်၌ (၂) ကြိမ် စုစုပေါင်း (၂၁) ကြိမ် ဆောင်ရွက်နိုင်ခဲ့ကြောင်း သိရသည်။
လွှတ်တော်နားရက်များတွင်လည်း သက်ဆိုင်ရာ လွှတ်တော်ကိုယ်စားလှယ်များ ပါဝင်သည့် ပြည်သူ့စကားဝိုင်းများကို အလျဉ်းသင့်သလို ဆက်လက်ကျင်းပသွားရန် စီစဉ်ထားကြောင်း ဒေါ်ဖြူဖြူရည်က ပြောကြားခဲ့သည်။