ပေကျင်း၊ ဇွန် ၁၆
လာမည့် နဂါးလှေပွဲတော် (Dragon Boat Festival) အားလပ်ရက်ကာလအတွင်း တရုတ်နိုင်ငံတစ်ဝန်း နယ်စပ်ဝင်ထွက်ခရီးသွားဦးရေ သိသိသာသာ မြင့်တက်လာမည်ဖြစ်ပြီး နေ့စဉ်ပျမ်းမျှ လူဝင်လူထွက် ၂ ဒသမ ၂ သန်းခန့် ရှိလာမည်ဟု တရုတ်နိုင်ငံတော် လူဝင်မှုကြီးကြပ်ရေးဌာန (NIA) က ဇွန်လ ၁၆ ရက်တွင် ခန့်မှန်းထုတ်ပြန်ခဲ့သည်။
NIA ၏ ခန့်မှန်းချက်အရ ယခုနှစ် နဂါးလှေပွဲတော် အားလပ်ရက်အတွင်း နယ်စပ်ဝင်ထွက်မှုမှာ ယခင်နှစ်ကာလတူထက် ၁၁ ဒသမ ၇ ရာခိုင်နှုန်း တိုးတက်လာမည်ဖြစ်ပြီး အများဆုံးခရီးသွားလာမှုရှိသည့် ရက်များတွင် နေ့စဉ် လူဝင်လူထွက်ဦးရေ ၂ ဒသမ ၃၅ သန်းအထိ ရောက်ရှိနိုင်ကြောင်း သိရသည်။
နဂါးလှေပွဲတော်သည် တရုတ်ရိုးရာပြက္ခဒိန်အရ ပဉ္စမလ၏ ပဉ္စမနေ့တွင် ကျရောက်သည့် ရိုးရာပွဲတော်တစ်ခုဖြစ်သည်။ ယခုနှစ်တွင် ဇွန်လ ၁၉ ရက်၌ ကျရောက်မည်ဖြစ်ပြီး အားလပ်ရက်ကို ဇွန်လ ၁၉ ရက်မှ ၂၁ ရက်အထိ သတ်မှတ်ထားကြောင်း သိရသည်။
အဆိုပါ အားလပ်ရက်ကာလအတွင်း ပြည်တွင်းနှင့် ပြည်ပခရီးသွားလာမှုများ မြင့်တက်လာမည်ဖြစ်သဖြင့် နယ်စပ်ဖြတ်သန်းရေး စစ်ဆေးရေးဂိတ်များတွင် လိုအပ်သည့် ဝန်ဆောင်မှုများကို တိုးမြှင့်ဆောင်ရွက်ထားကြောင်း NIA က ပြောကြားခဲ့သည်။
Ref: Xinhua