“ဝဇီရာရုံ သို့မဟုတ် ခေတ်များကို ဖြတ်သန်းခဲ့သော အနုပညာအမွေအနှစ်” စာတမ်းဖတ်ပွဲ ကျင်းပ၊ ပြန်ကြားရေးဝန်ကြီးဌာန ပြည်ထောင်စုဝန်ကြီး တက်ရောက်

ပြန်ကြားရေးနှင့် ပြည်သူ့ဆက်ဆံရေးဦးစီးဌာနက ကြီးမှူးကျင်းပသည့် “ဝဇီရာရုံ သို့မဟုတ် ခေတ်များကို ဖြတ်သန်းခဲ့သော အနုပညာအမွေအနှစ်” စာတမ်းဖတ်ပွဲ အခမ်းအနားကို ယနေ့ ဇွန်လ ၁၆ ရက် နံနက် ၁၀နာရီတွင် ရန်ကုန်မြို့ရှိ စာဆိုဗိမာန်၌ ကျင်းပပြုလုပ်ခဲ့ကြောင်း သိရသည်။

အခမ်းအနားတွင် ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဦးထိန်လင်းက တက်ရောက်၍ အဖွင့်အမှာစကား ပြောကြားကာ အခမ်းအနားကို ဖွင့်လှစ်ပေးခဲ့သည်။

ယင်းနောက် စာတမ်းဖတ်ပွဲ အစီအစဉ်များကို အပိုင်း (၃) ပိုင်းခွဲ၍ သက်ဆိုင်ရာ ကဏ္ဍအလိုက် ပညာရှင်များနှင့် အနုပညာရှင်ကြီးများက စာတမ်းများ အသီးသီး ဖတ်ကြားခဲ့ကြသည်။

စာတမ်းဖတ်ပွဲ ပထမပိုင်း အစီအစဉ်

နံနက်ပိုင်း စာတမ်းဖတ်ပွဲတွင် ဝဇီရာရုံ၏ သမိုင်းကြောင်းနှင့် ယဉ်ကျေးမှုဆိုင်ရာ အခန်းကဏ္ဍများကို အောက်ပါအတိုင်း ဖတ်ကြားခဲ့ကြသည် –
ဒါရိုက်တာ အကယ်ဒမီ ဦးကြည်စိုးထွန်း က “တစ်ခေတ်တစ်ခါက ဝဇီရာ” ခေါင်းစဉ်ဖြင့်လည်းကောင်း၊ ပါမောက္ခချုပ် ဒေါက်တာ ကေသီထွေး က “ဝဇီရာ သို့မဟုတ် ရုပ်ရှင်၊ သဘင်၊ ဂီတတို့ ရင်ခုန်ခဲ့ရာ သမိုင်းအမွေအနှစ်ရုံကြီး” ခေါင်းစဉ်ဖြင့်လည်းကောင်း၊ ဦးကျော်ဦး က “ဝဇီရာ သို့မဟုတ် ရန်ကုန်မြို့၏ ယဉ်ကျေးမှုနှလုံးသား” ခေါင်းစဉ်ဖြင့်လည်းကောင်း အသီးသီး ဖတ်ကြားဆွေးနွေးခဲ့ကြသည်။

စာတမ်းဖတ်ပွဲ ဒုတိယပိုင်း အစီအစဉ်

မွန်းလွဲပိုင်း ဒုတိယပိုင်းအစီအစဉ်တွင် အနုပညာသမိုင်းကြောင်းနှင့် အမှတ်တရများကို ဆက်လက်ဖတ်ကြားခဲ့ကြသည် –

ဒါရို-က်တာ အကယ်ဒမီ ဦးဇော်မြင့်ဦး က “ဝဇီရာ သို့မဟုတ် အနုပညာနှင့် အမှတ်တရများ စီးဆင်းခဲ့ရာနေရာ”ခေါင်းစဉ်ဖြင့်လည်းကောင်း၊ အကယ်ဒမီ ဒေါ်ဆွေဇင်ထိုက်က “ဝဇီရာ သို့မဟုတ် အတိတ်၏ အလင်းရောင်၊ ယနေ့၏အမွေအနှစ်” ခေါင်းစဉ်ဖြင့်လည်းကောင်း ဖတ်ကြား တင်ပြခဲ့ကြသည်။

စာတမ်းဖတ်ပွဲ တတိယပိုင်း အစီအစဉ်

တတိယပိုင်း အစီအစဉ်အဖြစ် ဝဇီရာရုံ ရေရှည်တည်တံ့ရေးနှင့် ထိန်းသိမ်းရေးဆိုင်ရာ စာတမ်းများကို ဖတ်ကြားခဲ့ကြသည် –

ဒေါ်ပတ္တမြားကေခိုင် က “ဝဇီရာရုံနှင့် ရန်ကုန်မြို့ယဉ်ကျေးမှု အမွေအနှစ် ထိန်းသိမ်းမြှင့်တင်ရေး” ခေါင်းစဉ်ဖြင့်လည်းကောင်း၊ ရေနံသာဝင်းမောင် က “ဝဇီရာရုပ်ရှင်ရုံကြီးတစ်ရုံ၏ အမှတ်တရများ” ခေါင်းစဉ်ဖြင့်လည်းကောင်း အသီးသီး ဖတ်ကြားခဲ့ကြပြီးနောက် အခမ်းအနားကို အောင်မြင်စွာ ရုပ်သိမ်းခဲ့ကြောင်း သိရသည်။