ကွန်ဂိုနှင့်ယူဂန်ဒါမှထိုင်းသို့လာသူအားလုံးကွာရန်တင်း ၂၁ ရက်ဝင်ရမည်

ဗဟိုအာဖရိကနိုင်ငံများမှ လာရောက်သူများ လာခြင်းနှင့် ပူးပေါင်းဆောင်ရွက်မှုပိုင်းတွင် အားနည်းခြင်းတို့ကြောင့် အီဘိုလာရောဂါဖြစ်ပွားနေသော ကွန်ဂိုဒီမိုကရက်တစ်သမ္မတနိုင်ငံနှင့် ယူဂန်ဒါနိုင်ငံများမှ ရောက်ရှိလာသူများအားလုံးက ၂၁ ရက်ကြာ မဖြစ်မနေ သီးခြားနေထိုင်ရမည့် အစီအစဉ်ကို ထိုင်းကျန်းမာရေးဝန်ကြီးဌာနက အင်္ဂါနေ့တွင် စတင်ခဲ့သည်။
         
ဗဟိုအာဖရိကနှစ်နိုင်ငံမှ ဝင်ရောက်သူများ ပိုများလာကြောင်း ကျန်းမာရေးဝန်ကြီးဌာန အမြဲတမ်းအတွင်းဝန် ဒေါက်တာဆွန်လာ့ခ် ဂျန်စမန်က အင်္ဂါနေ့တွင် ပြောကြားခဲ့သည်။ ၎င်းတို့ထဲမှ အချို့သည် ကျန်းမာရေးအရာရှိများထံ သတင်းပို့ရမည့်တာဝန်ကို ပျက်ကွက်ခဲ့ကြသည်ဟု ဆိုသည်။
        
ထို့ကြောင့် ဝန်ကြီးဌာနသည် ကွန်ဂို သို့မဟုတ် ယူဂန်ဒါနိုင်ငံမှ ရောက်ရှိလာသူများကို ၂၁ ရက်ကြာ သီးခြားခွဲနေထိုင်ရန် အချိန်ကာလသတ်မှတ်ခဲ့သည်။
     
ထိုနှစ်နိုင်ငံမှ ရောက်ရှိလာသူများသည် သုဝဏ္ဏဘူမိလေဆိပ်တွင်သာ ဆင်းသက်ရမည်ဖြစ်ကာ ထိုလေယာဉ်များပေါ်တွင် လိုက်ပါလာသူအားလုံးအနေဖြင့် နွန်ထာဘူရီပြည်နယ်ရှိ ဘမ်ရာနာရာဒူရာ ကူးစက်ရောဂါဌာနတွင် ကွာရန်တင်းဝင်ရမည်ဖြစ်ကြောင်း ဒေါက်တာဆွန်လာ့ခ်က ပြောကြားခဲ့သည်။
     
လာမည့် ၇၂ နာရီအတွင်း ရောက်ရှိလာသည့် ဧည့်သည်များအတွက် ကွာရန်တင်းနေထိုင်ရမည့် ကုန်ကျစရိတ်ကို ထိုင်းအစိုးရက ကျခံမည်ဖြစ်သည်။ ယင်းနောက်ပိုင်းမှ ရောက်ရှိလာသူများသည်မူ ၎င်းတို့၏ ကွာရန်တင်းနေထိုင်မှုအတွက် အခပေးဆောင်ရမည်ဖြစ်သည်။ သံသယဖြစ်ဖွယ် ရောဂါလက္ခဏာများ ပြသသည့် ဧည့်သည်များကို ချက်ချင်း ဆေးရုံပို့ဆောင်မည်ဖြစ်သည်။
       
အဆိုပါနှစ်နိုင်ငံမှ ဝင်ရောက်လာမည့်သူများကို လျှော့ချသွားရန် မျှော်လင့်ထားကြောင်း ကျန်းမာရေးဝန်ကြီးဌာနက ပြောကြားခဲ့သည်။

Ref: ဘန်ကောက်ပို့စ်