ပြီးခဲ့သည့် စနေနေ့က အရှေ့အလယ်ပိုင်းနိုင်ငံအချို့နှင့် ပါကစ္စတန်ခေါင်းဆောင်များနှင့် ဖုန်းဖြင့် ပူးတွဲဆွေးနွေးမှု ပြုလုပ်စဉ် ဝါရှင်တန်နှင့် အီရန်တို့အကြား ငြိမ်းချမ်းရေး သဘောတူညီချက် ရရှိပါက အစ္စရေးနှင့် ဆက်ဆံရေး ပုံမှန်ဖြစ်စေရန်အတွက် အေဘရာဟမ် သဘောတူညီချက် (Abraham Accords)တွင် ပါဝင်ကြရန် အမေရိကန်သမ္မတ ဒေါ်နယ်ထရမ့်က တိုက်တွန်းခဲ့ကြောင်း Axios သတင်းဌာနက အမေရိကန်အရာရှိ နှစ်ဦးကို ကိုးကား၍ ဖော်ပြချက်အရသိရသည်။
အဆိုပါ သတင်းဌာန၏ ဖော်ပြချက်အရ မေလ ၂၃ ရက်က ဘာရိန်း၊ အီဂျစ်၊ ဂျော်ဒန်၊ ကာတာ၊ ယူအေအီး၊ ပါကစ္စတန်၊ ဆော်ဒီအာရေဗျနှင့် တူရကီနိုင်ငံ ခေါင်းဆောင်များနှင့် ဖုန်းဖြင့် ဆွေးနွေးမှုအတွင်း ထရမ့်က အီရန်ပဋိပက္ခ ပြီးဆုံးသွားပြီးနောက် အေဘရာဟမ် သဘောတူညီချက်တွင် မပါဝင်သေးသည့် သို့မဟုတ် အစ္စရေးနှင့် ငြိမ်းချမ်းရေးစာချုပ် မရှိသေးသည့် နိုင်ငံများသည် တယ်လ်အဗီးဗ် (အစ္စရေး) နှင့် ၎င်းတို့၏ ဆက်ဆံရေးကို ပုံမှန်ပြန်လည် ပြုလုပ်ကြလိမ့်မည်ဟု မျှော်လင့်ကြောင်း ပြောကြားခဲ့သည်။
အစ္စရေးနှင့် သံတမန်ဆက်ဆံရေး မရှိကြသည့် ကာတာ၊ ပါကစ္စတန်နှင့် ဆော်ဒီအာရေဗျနိုင်ငံတို့မှ ကိုယ်စားလှယ်များသည် အမေရိကန်သမ္မတ၏ ယခုကဲ့သို့ တောင်းဆိုမှုကြောင့် အံ့အားသင့်သွားခဲ့ကြကြောင်း အဆိုပါ သတင်းဌာနကက ဖော်ပြထားသည်။
“လိုင်းပေါ်မှာ တိတ်ဆိတ်မှု ဖြစ်သွားခဲ့ပြီး ထရမ့်က သူတို့ ရှိသေးရဲ့လားလို့ နောက်ပြောင်ပြီး မေးခဲ့တယ်” ဟု အမေရိကန်အရာရှိတစ်ဦးက Axios သို့ ပြောကြားခဲ့သည်။
အမေရိကန်သမ္မတက သူ၏ အထူးကိုယ်စားလှယ် စတိဗ် ဝစ်ကော့ဖ် နှင့် စီးပွားရေးလုပ်ငန်းရှင် ဂျရက် ကူရှနာတို့သည် လာမည့်ရက်သတ္တပတ်များအတွင်း ထိုနိုင်ငံများနှင့် အစ္စရေးတို့အကြား ဆက်ဆံရေး ပုံမှန်ဖြစ်လာစေရေး ကိစ္စရပ်ကို ကိုင်တွယ်ဆောင်ရွက်သွားမည်ဖြစ်ကြောင်း မှတ်ချက်ပြု ပြောကြားခဲ့သည်။
အစောပိုင်းကလည်း အမေရိကန်သမ္မတသည် ၎င်း၏ လူမှုကွန်ရက်စာမျက်နှာဖြစ်သော Truth Social ပေါ်တွင် တင်ခဲ့သည့် ပို့စ်တစ်ခု၌ အနာဂတ်တွင် အီရန်နိုင်ငံအနေဖြင့်လည်း အေဘရာဟမ် သဘောတူညီချက်တွင် ပါဝင်ရန် ဆန္ဒရှိနိုင်ကြောင်း အရိပ်အမြွက် ပြောကြားခဲ့ဖူးသည်။
အေဘရာဟမ် သဘောတူညီချက်ကို ၂၀၂၀-၂၀၂၁ ခုနှစ်အတွင်း အမေရိကန်၏ ကြားဝင်စေ့စပ်ပေးမှုဖြင့် အစ္စရေးနှင့် အာရပ်နိုင်ငံအချို့အကြား ရရှိခဲ့ခြင်းဖြစ်သည်။ ၂၀၂၀ ပြည့်နှစ်တွင် ဘာရိန်း၊ မော်ရိုကိုနှင့် ယူအေအီးတို့သည် အစ္စရေးနှင့် ဆက်ဆံရေး ပုံမှန်ပြန်လုပ်ခဲ့ကြသည်။ ၂၀၂၁ ခုနှစ်တွင် ဆူဒန်နိုင်ငံက အစ္စရေးနှင့် သံတမန်ဆက်ဆံရေး ထူထောင်ကြောင်း ကြေညာခဲ့သည်။ ယင်းသဘောတူညီချက်များ မတိုင်မီက အာရပ်နိုင်ငံများထဲတွင် အီဂျစ်နှင့် ဂျော်ဒန်နိုင်ငံတို့သာ အစ္စရေးနှင့် သံတမန်ဆက်ဆံရေး ရှိခဲ့ခြင်းဖြစ်သည်။