ဒေသတွင်း တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးလုပ်ငန်းများ အောင်မြင်စွာ လျှောက်လှမ်းနိုင်ရန်အတွက် တိုင်းရင်းသားပြည်သူများအနေဖြင့် ယခုအစိုးရသစ်နှင့်အတူ အတူတကွ လက်တွဲပြီး အားသစ်မာန်သစ်ဖြင့် ဝိုင်းဝန်းကြိုးပမ်း ဆောင်ရွက်သွားကြရမည်ဖြစ်ကြောင်း တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး ဦးသန်းမောင်က ပြောကြားလိုက်သည်။
မွန်ပြည်နယ်အတွင်းရှိ တိုင်းရင်းသားစာပေနှင့် ယဉ်ကျေးမှု အသင်းအဖွဲ့များနှင့် တရားဝင်တွေ့ဆုံစဉ် ပြည်ထောင်စုဝန်ကြီးက ထိုသို့ တိုက်တွန်းပြောကြားခဲ့ခြင်း ဖြစ်သည်။
ငြိမ်းချမ်းရေးနှင့် ဖွံ့ဖြိုးတိုးတက်ရေး ဒွန်တွဲမှု
ပြည်ထောင်စုဝန်ကြီး ဦးသန်းမောင်က ဒေသတစ်ခု ဖွံ့ဖြိုးတိုးတက်ရန်အတွက် ငြိမ်းချမ်းရေးနှင့် တည်ငြိမ်မှုသည် ကင်းကွာ၍မရဘဲ ဒွန်တွဲလျက်ရှိကြောင်း၊ ထို့ကြောင့် မိမိတို့ဒေသ အေးချမ်းသာယာရေးအတွက် တိုင်းရင်းသားအဖွဲ့အစည်းများအားလုံးက သဟဇာတဖြစ်စွာ ပူးပေါင်းဆောင်ရွက်ကြရန် အလေးအနက် ထည့်သွင်းပြောကြားခဲ့သည်။
တွေ့ဆုံပွဲတက်ရောက်ခဲ့သည့် တာဝန်ရှိသူများ
အဆိုပါ မွန်ပြည်နယ် တိုင်းရင်းသားစာပေနှင့် ယဉ်ကျေးမှုအဖွဲ့များ တွေ့ဆုံပွဲသို့ တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး ဦးသန်းမောင်နှင့်အတူ မွန်ပြည်နယ် ဗမာတိုင်းရင်းသားလူမျိုးရေးရာဝန်ကြီး ဦးမျိုးမင်းလှိုင်၊ ကရင်တိုင်းရင်းသားလူမျိုးရေးရာဝန်ကြီး ဦးအောင်ကျော်သိန်း၊ ပအိုဝ်းတိုင်းရင်းသားလူမျိုးရေးရာဝန်ကြီး ဦးချစ်သိန်းတို့လည်း အတူတကွ တက်ရောက်ခဲ့ကြကြောင်း သိရသည်။