မြန်မာနိုင်ငံ၏ ထင်ရှားသော ခရီးသွားဒေသတစ်ခုဖြစ်သည့် မြိတ်ကျွန်းစုအတွင်းရှိ လန်ပိအဏ္ဏဝါအမျိုးသားဥယျာဉ်အတွင်းမှ ဝါးအလယ်ကျွန်းအပန်းဖြေစခန်းသို့ ယခုခရီးသွားရာသီအတွင်း ဥရောပနိုင်ငံများမှ နိုင်ငံခြားသားခရီးသွားများ အများအပြား လာရောက်အပန်းဖြေခဲ့ကြကြောင်း သိရသည်။
နိုင်ငံတကာခရီးသွားများ စိတ်ဝင်စားမှု
ယခုနှစ် ခရီးသွားရာသီအတွင်း ဂျာမနီ၊ ရုရှား၊ အမေရိကန်၊ အင်္ဂလန်၊ ပြင်သစ်၊ အီတလီနှင့် ချက်ပြည်သူ့သမ္မတနိုင်ငံတို့မှ ကမ္ဘာလှည့်ခရီးသွားများ ဝင်ရောက်ခဲ့ကြပြီး၊ ၎င်းတို့အနက် ဂျာမနီနိုင်ငံသားများမှာ အများဆုံးဖြစ်ကာ ရုရှားနှင့် အမေရိကန်နိုင်ငံသားများမှာ ဒုတိယနှင့် တတိယအများဆုံး ဖြစ်ကြသည်။ ခရီးသွားများသည် မြိတ်ကျွန်းစု၏ ပင်လယ်ပြင်သဘာဝအလှအပများ၊ ရှားပါးဇီဝမျိုးစိတ်များ၊ သဘာဝအတိုင်း ထိန်းသိမ်းထားသည့် သန္တာကျောက်တန်းများနှင့် ဒီရေရောက်တောများကို စိတ်ဝင်တစား လာရောက်လေ့လာကြခြင်း ဖြစ်သည်။
ဝန်ဆောင်မှုနှင့် ကုန်ကျစရိတ်
ဝါးအလယ်ကျွန်းအပန်းဖြေစခန်းတွင် သဘာဝပတ်ဝန်းကျင်ကို ထိန်းသိမ်းသောအားဖြင့် တစ်ရက်လျှင် ဧည့်သည် (၄၀) ကျော်အထိသာ ကန့်သတ်လက်ခံလေ့ရှိပြီး သဘာဝသစ်သားအိမ်များ၊ ပင်လယ်အစားအစာများဖြင့် ဝန်ဆောင်မှုပေးလျက်ရှိသည်။ ဝန်ဆောင်ခနှုန်းထားများမှာ –
ဒီဇင်ဘာနှင့် ဇန်နဝါရီ: တစ်ဦးလျှင် အမေရိကန်ဒေါ်လာ (၈၅၀)။
ကျန်လများ: တစ်ဦးလျှင် အမေရိကန်ဒေါ်လာ (၈၀၀) ခန့် သတ်မှတ်ထားသည်။
ကြိုတင်စာရင်းပေးသွင်းမှု
ပုံမှန်အားဖြင့် နိုဝင်ဘာလမှ ဧပြီလကုန်အထိ ခရီးသွားများ လာရောက်လေ့ရှိပြီး လာမည့်ခရီးသွားရာသီအတွက် ယခုမေလမှစတင်ကာ ကြိုတင်စာရင်းများ (Booking) လက်ခံနေပြီဖြစ်ကြောင်း အပန်းဖြေစခန်း တာဝန်ရှိသူများထံမှ သိရသည်။
သမိုင်းဝင် လန်ပိကျွန်း
ဝါးအလယ်ကျွန်း တည်ရှိရာ လန်ပိကျွန်းကို ၁၉၉၆ ခုနှစ်တွင် လန်ပိအဏ္ဏဝါအမျိုးသားဥယျာဉ်အဖြစ် သတ်မှတ်ခဲ့ပြီး ၂၀၀၃ ခုနှစ်တွင် အာဆီယံအမွေအနှစ်ဥယျာဉ်အဖြစ် အသိအမှတ်ပြုခံခဲ့ရသောကြောင့် ကမ္ဘာလှည့်ခရီးသွားများအကြားတွင် ထင်ရှားကျော်ကြားသော ဒေသတစ်ခု ဖြစ်လာခဲ့ကြောင်း သတင်းရရှိသည်။
