မကွေးတိုင်း၊ မင်းဘူးခရိုင်အတွင်းရှိ ဂရန်အင်းများနှင့် တင်ဒါပိုက်ချက်များအတွက် ၂၀၂၆-၂၀၂၇ ခုနှစ် ငါးလုပ်ငန်းရာသီ ပထမအကြိမ်လေလံတင်ရောင်းချပွဲကို မေ ၁၂ ရက်နံနက်ပိုင်းကပြုလုပ်ခဲ့သည်။
လေလံပွဲကို မင်းဘူးခရိုင်နှင့် ပွင့်ဖြူမြို့နယ် ငါးလုပ်ငန်းဦးစီးဌာနတို့မှကြီးမှူး၍ တိုင်းငါးလုပ်ငန်းဦးစီးဌာနမှူးကကြီးကြပ်သူအဖြစ်ဆောင်ရွက်ခဲ့ကာ မင်းဘူးခရိုင်ရှိ မြို့နယ်အလိုက် ဂရန်အင်းနှင့် ပိုက်ချက်များကို အင်းသားကြီးများထံသို့ ဈေးပြိုင်စနစ်ဖြင့်လေလံတင် ရောင်းချခဲ့သည်။
မင်းဘူး (စကု) မြို့နယ်မှ ဂရန်အင်း (၂) အင်းနှင့် တင်ဒါပိုက်ချက် (၁၁) ခု၊ ပွင့်ဖြူမြို့နယ်မှ ဂရန်အင်း (၂) အင်းနှင့် တင်ဒါပိုက်ချက် (၅) ခုတို့ကို လုပ်ထုံးလုပ်နည်းများနှင့်အညီ ပွင့်လင်းမြင်သာစွာရောင်းချပေးခဲ့သည်။
လေလံပွဲတွင် တာဝန်ရှိသူများက အင်းလုပ်ပိုင်ခွင့်ရရှိသူများအနေဖြင့် သတ်မှတ်ထားသောစည်းကမ်းချက်များလိုက်နာရန်၊ ငါးမျိုးပြုန်းတီးမှုမရှိစေရန်နှင့် ငါးလုပ်ငန်းဥပဒေများကို လေးစားလိုက်နာရန်တို့ကိုမှာ ကြားခဲ့သည်။
ယခုကဲ့သို့ ငါးလုပ်ငန်းရာသီသစ်အတွက် လေလံပွဲများကို စနစ်တကျကျင်းပခြင်းသည် ဒေသတွင်းစီးပွားရေးအတွက် အရေးပါသော ခြေလှမ်းတစ်ခုဖြစ်ကာ ဈေးပြိုင်စနစ်ဖြင့်လေလံတင်ခြင်းသည် နိုင်ငံတော်အတွက် ထိုက်သင့်သော အခွန်ဘဏ္ဍာများရရှိစေသည့်အပြင် ရေလုပ်ငန်းလုပ်ကိုင်သူများကြား တရားမျှတသည့် ယှဉ်ပြိုင်မှုကို ဖြစ်ပေါ်စေသည်။
မင်းဘူးခရိုင်ရှိ မြစ်ချောင်း၊ အင်းအိုင်များမှ စနစ်တကျ ငါးဖမ်းဆီးထုတ်လုပ်နိုင်ခြင်းက ဒေသတွင်း ငါးလိုအပ်ချက်ကိုဖြည့်ဆည်းပေးနိုင်ပြီး ဈေးနှုန်းတည်ငြိမ်မှုကို အထောက်အကူပြုစေသည့်အပြင် ငါးလုပ်ငန်းဦးစီးဌာန၏ ကြီးကြပ်မှုဖြင့် လေလံပေးခြင်းဖြစ်၍ သတ်မှတ်ထားသော ငါးဖမ်းရာသီနှင့် ကိရိယာများကိုအသုံးပြုစေခြင်းဖြင့် ငါးသယံဇာတများရေရှည်တည်တံ့အောင် ထိန်းသိမ်းရာရောက်သည်။
